لاہور، 6 اگست 2026 (نوشین): پاکستان ہاکی فیڈریشن (پی ایچ ایف) نے ایف آئی ایچ مینز ہاکی ورلڈ کپ 2026 کے لیے 20 رکنی قومی اسکواڈ کا اعلان کر دیا ہے۔ عالمی کپ 15 سے 30 اگست تک نیدرلینڈز اور بیلجیئم میں مشترکہ طور پر کھیلا جائے گا۔ قومی اسکواڈ میں تجربہ کار بین الاقوامی کھلاڑیوں کے ساتھ باصلاحیت نوجوان کھلاڑیوں کو بھی شامل کیا گیا ہے، کیونکہ پاکستان عالمی ہاکی کے سب سے بڑے ایونٹ میں بھرپور واپسی کی تیاری کر رہا ہے۔ گول کیپرز کے طور پر وقار اور علی رضا کو اسکواڈ میں شامل کیا گیا ہے۔ قومی ٹیم کے منیجر محمد اویس قرنی ہوں گے، جبکہ ڈچ کوچ باب یوہان ویلڈہوف ہیڈ کوچ کی ذمہ داریاں نبھائیں گے۔ کرسٹوفر جان بوون اور عدنان ذاکر کو اسسٹنٹ کوچز مقرر کیا گیا ہے، جبکہ اشرف سلطان ویڈیو اینالسٹ کے فرائض انجام دیں گے۔
پاکستان کو ورلڈ کپ کے پول ڈی میں انگلینڈ، بھارت اور ویلز کے ساتھ رکھا گیا ہے، جہاں قومی ٹیم کو گروپ مرحلے میں سخت مقابلوں کا سامنا کرنا ہوگا۔ پی ایچ ایف کے صدر محی الدین احمد وانی نے منتخب اسکواڈ پر اعتماد کا اظہار کرتے ہوئے کہا کہ قومی ٹیم عالمی کپ میں بہترین کارکردگی دکھانے کی بھرپور صلاحیت رکھتی ہے۔ انہوں نے شائقین سے اپیل کی کہ وہ قومی ٹیم کی بھرپور حوصلہ افزائی کریں۔ پاکستان نے عالمی ہاکی میں دوبارہ جگہ بناتے ہوئے ورلڈ کپ کے لیے کوالیفائی کیا ہے، تاہم قومی ٹیم ایف آئی ایچ پرو لیگ کی مایوس کن مہم کے بعد بہتر کارکردگی دکھانے کے عزم کے ساتھ میدان میں اترے گی، جہاں اسے دنیا کی ٹاپ رینکنگ ٹیموں کے خلاف تمام 16 میچوں میں شکست کا سامنا کرنا پڑا تھا۔ قومی ٹیم آئندہ چند روز میں اپنی حتمی تیاریوں کو مکمل کرنے کے بعد ورلڈ کپ میں شرکت کے لیے یورپ روانہ ہوگی۔