اسلام آباد، 7 نومبر, 2026 (نوشین): پاکستان اور سوڈان نے سائبر جرائم کی روک تھام اور باہمی تعاون کو فروغ دینے کے لیے مفاہمتی یادداشت (ایم او یو) پر دستخط کرنے کا فیصلہ کیا ہے۔ یہ فیصلہ وفاقی وزیر داخلہ محسن نقوی اور پاکستان کے دورے پر آئے ہوئے سوڈان کے وزیر داخلہ لیفٹیننٹ جنرل بابیکر سامرا مصطفیٰ علی کے درمیان وزارت داخلہ میں ہونے والی وفود کی سطح کی ملاقات کے دوران کیا گیا، جس میں وزیر مملکت برائے داخلہ طلال چوہدری بھی شریک تھے۔ سوڈانی وزیر داخلہ نے کہا کہ ان کا ملک سائبر جرائم کی روک تھام کے حوالے سے پاکستان کے تجربات اور مہارت سے استفادہ کرنا چاہتا ہے۔ وزارت داخلہ کے مطابق دونوں ممالک نے سکیورٹی، داخلی امور، پولیس کی تربیت، ادارہ جاتی تعاون، نیشنل ڈیٹا بیس اینڈ رجسٹریشن اتھارٹی (نادرا) اور دیگر شعبوں میں دوطرفہ تعاون بڑھانے پر بھی اتفاق کیا۔ اس موقع پر محسن نقوی نے کہا کہ پاکستان امن کے قیام اور سوڈان کی تعمیر نو کے لیے ہر ممکن تعاون فراہم کرنے کے لیے تیار ہے۔ انہوں نے سوڈانی پولیس افسران کو پیشہ ورانہ تربیت فراہم کرنے کی بھی پیشکش کی۔ سوڈانی وزیر داخلہ کو بریفنگ دیتے ہوئے محسن نقوی نے بتایا کہ نادرا کے تعاون سے سوڈان میں 3 کروڑ 60 لاکھ شہریت کارڈز، 90 لاکھ قومی شناختی کارڈز، ایک کروڑ 80 لاکھ پیدائشی سرٹیفکیٹس اور 5 لاکھ ڈیتھ سرٹیفکیٹس جاری کیے جا چکے ہیں۔ انہوں نے کہا کہ نادرا شہریوں کی رجسٹریشن کے عمل میں مزید تعاون جاری رکھنے کے لیے بھی تیار ہے۔ سوڈانی وزیر داخلہ کی جانب سے پاکستانی خواتین سے شادی کرنے والی سوڈانی خواتین کو درپیش ویزا مسائل کی نشاندہی پر محسن نقوی نے متعلقہ حکام کو ان مسائل کے فوری حل کی ہدایت کی۔ وزیر داخلہ نے مزید کہا کہ سوڈانی شہری پاکستان میں طبی سہولیات سے استفادہ کر سکتے ہیں اور انہیں صحت کے شعبے میں ہر ممکن سہولت فراہم کی جائے گی۔ اس موقع پر سوڈانی وزیر داخلہ نے پاکستان کو برادر ملک قرار دیتے ہوئے کہا کہ سوڈان تمام شعبوں میں پاکستان کے ساتھ تعاون کو خصوصی اہمیت دیتا ہے۔ انہوں نے مختلف شعبوں میں دوطرفہ روابط مزید مضبوط بنانے کی خواہش کا اظہار کیا اور پاکستان کے تعاون پر شکریہ ادا کیا۔ ایک روز قبل سوڈانی وزیر داخلہ نے چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر سے بھی ملاقات کی تھی، جس میں دونوں ممالک کے درمیان باہمی تعاون بڑھانے کے امکانات پر تبادلہ خیال کیا گیا۔ اس سے قبل جمعرات کو انہوں نے وزیراعظم شہباز شریف سے ملاقات کی تھی، جس میں انہوں نے سوڈان میں امن و سلامتی کی بحالی کے لیے عالمی فورمز پر پاکستان کی حمایت کو سراہا تھا۔