نیویارک، 29 جولائی 2026(نوشین): پاکستان نے شمالی امریکہ کی معروف بین الاقوامی ٹیکسٹائل نمائش ٹیکس ورلڈ نیویارک سٹی 2026 میں بھرپور شرکت کرتے ہوئے پاکستان پویلین کا افتتاح کیا، جو نیویارک کے جیکب کے۔ جاوٹس کنونشن سینٹر میں منعقد ہو رہی ہے۔
پاکستان پویلین کا باقاعدہ افتتاح امریکہ میں پاکستان کے سفیر رضوان سعید شیخ نے نیویارک میں پاکستان کے قونصل جنرل عامر احمد اتوزئی اور تجارتی و سرمایہ کاری مشیر عدنان محمود اعوان کے ہمراہ کیا۔
پاکستان پویلین کا انعقاد ٹریڈ ڈویلپمنٹ اتھارٹی آف پاکستان (ٹی ڈی اے پی) نے نیویارک میں پاکستان کے قونصل خانے کے تجارتی و سرمایہ کاری شعبے کے تعاون سے کیا ہے۔ پویلین میں پاکستان کی ویلیو ایڈڈ ٹیکسٹائل مصنوعات، ملبوسات، گھریلو ٹیکسٹائل، چمڑے کی مصنوعات، کھیلوں کا سامان اور دیگر برآمدی مصنوعات کی اعلیٰ معیار کی نمائش کی جا رہی ہے۔
اس موقع پر خطاب کرتے ہوئے سفیر رضوان سعید شیخ نے کہا کہ پاکستان کی ٹیکسٹائل صنعت ملکی معیشت میں ریڑھ کی ہڈی کی حیثیت رکھتی ہے۔ انہوں نے برآمدات کے فروغ، بین الاقوامی خریداروں کو راغب کرنے اور امریکہ کے ساتھ تجارتی و اقتصادی تعلقات کو مزید مضبوط بنانے کے لیے حکومتِ پاکستان کے عزم کا اعادہ کیا۔
قونصل جنرل عامر احمد اتوزئی نے کہا کہ پاکستان عالمی منڈی میں معیاری مصنوعات فراہم کرنے والے ایک قابلِ اعتماد ملک کے طور پر اپنی شناخت مستحکم کر چکا ہے۔ انہوں نے پاکستانی اور امریکی کاروباری اداروں کے درمیان تجارتی روابط اور سرمایہ کاری کے فروغ کے لیے قونصل خانے کے مکمل تعاون کا یقین دلایا۔
تجارتی و سرمایہ کاری مشیر عدنان محمود اعوان نے کہا کہ ٹیکس ورلڈ نیویارک سٹی پاکستانی برآمد کنندگان کو عالمی خریداروں سے روابط استوار کرنے، اپنی جدید مصنوعات متعارف کرانے اور امریکی منڈی میں اپنی موجودگی مزید مستحکم کرنے کا بہترین موقع فراہم کرتی ہے۔
پاکستان پویلین میں پانچ نمایاں پاکستانی کمپنیاں اپنی مصنوعات کی نمائش کر رہی ہیں، جن میں گھریلو ٹیکسٹائل، تولیے، ملبوسات، چمڑے کے ملبوسات، کھیلوں کا لباس، دستانے اور دیگر ٹیکسٹائل مصنوعات شامل ہیں۔
نمائش میں شریک کمپنیاں درج ذیل ہیں:
اے ون انفینٹی
ایم آر آئی گروپ
ہوم ٹیکس کارپوریشن
روقی اسپورٹس
نزا اسپورٹس
تین روزہ نمائش کے دوران پاکستانی کمپنیاں امریکہ اور دیگر ممالک سے آنے والے خریداروں، درآمد کنندگان، کاروباری اداروں اور ٹیکسٹائل صنعت سے وابستہ نمائندوں سے ملاقاتیں کریں گی تاکہ پاکستان کی اعلیٰ معیار کی مصنوعات، صنعتی مہارت، جدت اور برآمدی صلاحیت کو عالمی سطح پر اجاگر کیا جا سکے۔
ٹیکس ورلڈ نیویارک سٹی 2026 میں پاکستان کی شرکت عالمی ٹیکسٹائل منڈی میں اپنی موجودگی مزید مضبوط بنانے، برآمدات میں اضافے اور بین الاقوامی خریداروں کے ساتھ طویل المدتی تجارتی شراکت داری کے فروغ کے عزم کی عکاس ہے۔ یہ نمائش 29 سے 31 جولائی 2026 تک جیکب کے۔ جاوٹس کنونشن سینٹر، نیویارک میں جاری رہے گی۔