اسلام آباد، 8 اکتوبر 2026 (نوشین): وزیراعظم محمد شہباز شریف نے تمام وفاقی وزارتوں کو ہدایت کی ہے کہ صوبائی حکومتوں اور متعلقہ اداروں کے تعاون سے مقررہ مدت کے اندر متعلقہ ڈیٹا کو ڈیجیٹلائز کرنے کے اقدامات مکمل کیے جائیں اور اسے بروقت مرکزی ڈیٹا سینٹر کو فراہم کیا جائے۔ ڈیجیٹل نیشن پاکستان پروگرام پر پیش رفت کا جائزہ لینے کے لیے اجلاس کی صدارت کرتے ہوئے وزیراعظم نے کہا کہ قومی سطح پر قائم مرکزی ڈیٹا سینٹر حکومتی خدمات کی فراہمی اور شہریوں کو سہولیات فراہم کرنے میں اہم کردار ادا کرے گا۔ انہوں نے کہا کہ وفاقی وزارتوں کی ذمہ داریوں کا واضح تعین اور متعلقہ ڈیٹا کی مرکزی ڈیٹا سینٹر کو فراہمی حکومتی نظام کو جدید تقاضوں سے ہم آہنگ کرنے میں مدد دے گی۔ وزیراعظم شہباز شریف نے کہا کہ ڈیجیٹل نیشن پاکستان پروگرام کا مقصد قومی سطح پر شہریوں کو مؤثر اور آسان خدمات کی فراہمی یقینی بنانا ہے، جبکہ مختلف شعبوں اور سرکاری اداروں کے مفید ڈیٹا کو ایک ہی جگہ دستیاب بنانے سے ملکی معاشی ترقی میں نمایاں مدد مل سکتی ہے۔ مستحق افراد کے لیے ایندھن سبسڈی اسکیم کا حوالہ دیتے ہوئے وزیراعظم نے کہا کہ اداروں کے درمیان ڈیٹا شیئرنگ نے اس منصوبے کی کامیاب عملدرآمد میں اہم کردار ادا کیا۔ انہوں نے کہا کہ وزارتوں کی کارکردگی اور متعلقہ ڈیٹا کو ڈیجیٹلائز کرنا بدعنوانی اور ادارہ جاتی بدانتظامی کی روک تھام کے لیے ضروری ہے۔ وزیراعظم نے وزارت صحت کی جانب سے صوبائی حکومتوں کے تعاون سے قومی سطح پر عالمی معیار کے طبی ریکارڈز کے قیام کے لیے کیے گئے اقدامات کو سراہا۔ انہوں نے ملک بھر میں معیاری ادویات کی دستیابی اور تصدیق یقینی بنانے کے لیے کیو آر کوڈز کے نفاذ کو بھی سراہا۔
وزارت انفارمیشن ٹیکنالوجی نے اجلاس کو بریفنگ دیتے ہوئے بتایا کہ متعلقہ وزارتوں کے فعال تعاون سے مختلف شعبوں کے مخصوص ڈیٹا کو ڈیجیٹلائز کرنے کے لیے جامع اقدامات کیے جا رہے ہیں۔ اجلاس کو بتایا گیا کہ عوامی سہولت کو مدنظر رکھتے ہوئے بنیادی خدمات کے شعبوں بالخصوص صحت اور زراعت سمیت دیگر وزارتوں میں ڈیجیٹلائزیشن کا عمل ترجیحی بنیادوں پر مکمل کیا جا رہا ہے۔ وزارت انفارمیشن ٹیکنالوجی، وزارت قانون کے تعاون سے متعلقہ قومی قوانین کو ایک ہی جگہ دستیاب بنانے کے لیے بھی مؤثر اقدامات کر رہی ہے، جس سے مستقبل میں قانون سازی کے لیے بہتر رہنمائی حاصل ہوگی۔ اجلاس کو مزید بتایا گیا کہ وزیراعظم کی ہدایات کے مطابق ترجیحی شعبوں کی ڈیجیٹلائزیشن پر کام جاری ہے اور ڈیجیٹل حکومتی خدمات، ڈیجیٹل معیشت اور عوامی سہولت کے اہداف کے حصول کے لیے خصوصی اقدامات کیے جا رہے ہیں۔ مختلف وفاقی وزارتوں نے اجلاس کو اپنی عوامی خدمات، کارکردگی اور مرکزی ڈیٹا سینٹر کو متعلقہ ڈیٹا فراہم کرنے کے حوالے سے پیش رفت پر بریفنگ دی۔ وزارت قومی صحت سے متعلق ڈیٹا کی مرکزی ڈیٹا سینٹر کو فراہمی اور ادویات کے معیار کی تصدیق کے لیے ڈیجیٹلائزیشن کے استعمال پر بھی خصوصی بریفنگ دی گئی۔ اجلاس میں وزیر قانون اعظم نذیر تارڑ، وزیر خزانہ محمد اورنگزیب، وزیر اقتصادی امور احد خان چیمہ، وزیر تجارت جام کمال خان، وزیر اطلاعات و نشریات عطا اللہ تارڑ، وزیر قومی صحت خدمات سید مصطفیٰ کمال، وزیر انفارمیشن ٹیکنالوجی شزہ فاطمہ خواجہ اور متعلقہ سرکاری اداروں کے اعلیٰ حکام نے شرکت کی۔