نیویارک، 11 ستمبر 2026 (غفران): نیویارک میں جمعہ کے روز 11 ستمبر 2001 کے دہشت گرد حملوں کی 25ویں برسی انتہائی افسردہ ماحول میں منائی گئی، تاہم تقریب امریکی صدر ڈونلڈ ٹرمپ کی عدم شرکت اور شہر کے پہلے مسلم میئر زوہران ممدانی کی شرکت پر دائیں بازو کے حلقوں کی تنقید کے باعث تنازع کا شکار رہی۔ صدر ٹرمپ نے نیویارک کی تقریب میں شرکت کرنے کے بجائے پینٹاگون میں متاثرین کو خراج عقیدت پیش کیا، جہاں ہائی جیک کیے گئے طیاروں نے ورلڈ ٹریڈ سینٹر کو نشانہ بنایا تھا اور اس روز مجموعی طور پر 2 ہزار 977 افراد ہلاک ہوئے تھے۔ نائب صدر جے ڈی وینس کے علاوہ ٹرمپ کے چار زندہ سابق صدور جارج ڈبلیو بش، جو حملوں کے وقت صدر تھے، جو بائیڈن، باراک اوباما اور بل کلنٹن بھی لوئر مین ہٹن میں واقع گراؤنڈ زیرو پر جمع ہوئے۔ تقریب مقامی وقت کے مطابق صبح 8 بج کر 40 منٹ کے فوراً بعد شروع ہوئی اور اسے سیاسی نوعیت سے پاک رکھتے ہوئے کوئی تقاریر نہیں کی گئیں، جبکہ متاثرہ خاندانوں کے افراد نے حملوں میں ہلاک ہونے والے تمام افراد کے نام پڑھ کر سنائے اور حملوں کے اہم لمحات کی یاد میں گھنٹیاں بجائی گئیں۔ 11 ستمبر 2001 کو القاعدہ کے 19 ارکان نے چار مسافر طیارے ہائی جیک کیے تھے، جن میں سے دو ورلڈ ٹریڈ سینٹر کے جڑواں ٹاورز سے ٹکرائے، ایک پینٹاگون سے جا ٹکرایا جبکہ چوتھا طیارہ مسافروں کی مزاحمت کے بعد پنسلوانیا کے قریب ایک میدان میں گر کر تباہ ہوگیا۔ ان حملوں کے نتیجے میں امریکا کی مشرق وسطیٰ میں کئی برس تک فوجی مداخلت جاری رہی اور واشنگٹن کی خارجہ پالیسی اور انسانی حقوق کے ریکارڈ پر شدید بحث چھڑ گئی۔ نیویارک کے پہلے مسلم میئر زوہران ممدانی نے ان حلقوں کی مہم کے باوجود تقریب میں شرکت کی جو انہیں تقریب سے دور رہنے کا مطالبہ کر رہے تھے، جبکہ دائیں بازو کے ناقدین، جن میں نیویارک پوسٹ اور سابق میئر روڈی جولیانی شامل تھے، نے ان کی شرکت پر اعتراض کیا۔ ایک درخواست پر ایک لاکھ سے زائد دستخط بھی جمع ہوئے جس میں ممدانی پر ایسے افراد سے روابط کا الزام عائد کیا گیا جو مبینہ طور پر امریکی اداروں کو اہمیت نہیں دیتے یا انتہا پسند نظریات کی مناسب مخالفت نہیں کرتے۔
سٹی کونسل کی رکن شانا حنیف نے کہا کہ یہ تشویش ناک امر ہے کہ صرف مسلمان ہونے کی وجہ سے میئر کے ساتھ مختلف سلوک کیا جا رہا ہے۔ ممدانی کو حال ہی میں ان دستاویزات کے اجرا پر بھی سراہا گیا جن سے یہ ظاہر ہوتا ہے کہ ورلڈ ٹریڈ سینٹر حملوں کے بعد لوئر مین ہٹن میں فضائی آلودگی اور زہریلے ذرات کی سطح کے بارے میں شہری حکام کو کیا معلومات حاصل تھیں۔ ورلڈ ٹریڈ سینٹر کے انہدام کے بعد گرد و غبار کے ایک بڑے بادل کے ساتھ کئی ماہ تک آلودگی اور زہریلے ذرات موجود رہے، جن کے باعث ہزاروں افراد مختلف بیماریوں اور کینسر کا شکار ہوئے۔ حملوں سے متاثرہ افراد کے لیے قائم وفاقی طبی پروگرام کے مطابق اب تک 9 ہزار 400 سے زائد افراد نائن الیون سے متعلق بیماریوں کے باعث ہلاک ہو چکے ہیں۔ لوئر مین ہٹن میں بڑی تعداد میں لوگوں کی آمد کے پیش نظر نائن الیون میموریل اور میوزیم کے اطراف سکیورٹی کے سخت انتظامات کیے گئے، جبکہ نیویارک پولیس کمشنر جیسیکا ٹش نے بتایا کہ احتیاطی طور پر ڈرون مخالف ٹیم بھی تعینات کی گئی ہے، تاہم انہوں نے واضح کیا کہ کسی مخصوص خطرے سے متعلق کوئی انٹیلی جنس معلومات موجود نہیں۔