مسقط، 7 اکتوبر 2026 (نوشین): وزیراعلیٰ پنجاب مریم نواز شریف نے عمان کے وزیر ہاؤسنگ و شہری منصوبہ بندی ڈاکٹر خلفان بن سعید بن مبارک الشعیلی سے ملاقات کی، جس میں رہائش اور شہری منصوبہ بندی سے متعلق امور پر تفصیلی تبادلہ خیال کیا گیا۔ عمانی وزیر نے مریم نواز شریف اور ان کے وفد کا گرمجوشی سے استقبال کیا اور انہیں اقوام متحدہ کے ادارے برائے انسانی آبادکاری کی جانب سے اسکرول آف آنر ایوارڈ ملنے پر مبارکباد دی، جبکہ پنجاب کی ’’اپنی چھت اپنا گھر‘‘ ہاؤسنگ اسکیم میں بھی گہری دلچسپی کا اظہار کیا۔ مریم نواز نے پنجاب کی ہاؤسنگ اسکیم کو سراہنے پر عمانی وزیر کا شکریہ ادا کیا اور انہیں اسکیم کی تفصیلات سے آگاہ کیا، جبکہ ’’اپنا کھیت اپنا روزگار‘‘، ’’اپنی زمین اپنا گھر‘‘ اور ’’اپنی چھت محفوظ چھت‘‘ جیسے اقدامات پر بھی روشنی ڈالی۔ وزیراعلیٰ پنجاب نے کہا کہ صرف 18 ماہ میں ’’اپنی چھت اپنا گھر‘‘ اسکیم کے تحت 2 لاکھ سے زائد افراد کو گھروں کی تعمیر کے لیے قرضوں کی فراہمی ایک غیر معمولی کامیابی ہے۔ انہوں نے بتایا کہ اسکیم کے تحت 260 ارب روپے کے بلاسود قرضے جاری کیے جاچکے ہیں جبکہ اقساط کی وصولی بھی شروع ہوگئی ہے۔ مریم نواز نے کہا کہ اسکیم کے تحت 1 لاکھ 25 ہزار سے زائد خاندان اپنے ذاتی گھروں میں منتقل ہوچکے ہیں، جبکہ میرٹ اور شفافیت اس پروگرام کی نمایاں خصوصیات ہیں اور مستحق افراد کو فائدہ حاصل کرنے کے لیے کسی سفارش کی ضرورت نہیں۔ وزیراعلیٰ پنجاب نے کہا کہ وہ ’’اپنی چھت اپنا گھر‘‘ پروگرام کے تحت 10 لاکھ گھر تعمیر کرنا چاہتی ہیں، تاہم معاشی مشکلات اس مقصد کی راہ میں رکاوٹ ہیں۔ انہوں نے کہا کہ کم آمدنی والے افراد کے لیے 5 لاکھ گھر تعمیر کرنے کا ہدف پانچ سال کے اندر حاصل کرلیا جائے گا۔ مریم نواز کے مطابق صرف 14 ہزار روپے کی قابل برداشت ماہانہ قسط کے باعث اسکیم میں قرضوں کی واپسی کی شرح 99 فیصد سے زیادہ ہے۔ انہوں نے کہا کہ پنجاب بھر کا مکمل ڈیٹا پنجاب سماجی و معاشی رجسٹری کے تحت مرتب کیا گیا ہے تاکہ رہائشی ضروریات کا درست تعین کیا جاسکے۔ عمانی وزیر ڈاکٹر خلفان نے کہا کہ عمان میں مقیم پاکستانی برادری قابل قدر خدمات انجام دے رہی ہے اور عمان مریم نواز شریف سمیت ہر پاکستانی کے لیے دوسرے گھر کی حیثیت رکھتا ہے۔ انہوں نے بتایا کہ عمان میں ہاؤسنگ قرضوں کے دو ماڈل موجود ہیں اور ایک ہزار ڈالر سے کم آمدنی رکھنے والے افراد کو رہائشی گرانٹس بھی فراہم کی جاتی ہیں، جبکہ قرضے عمان ہاؤسنگ بینک کے ذریعے دیے جاتے ہیں۔ تاہم انہوں نے ’’اپنی چھت اپنا گھر‘‘ اسکیم کو بہتر اقدام قرار دیتے ہوئے کہا کہ اس میں بلاسود قرضے فراہم کیے جاتے ہیں۔ ڈاکٹر خلفان نے بتایا کہ عمان میں ہاؤسنگ اور شہری ترقی کے لیے دو الگ محکمے کام کر رہے ہیں، جبکہ مسقط میں شہری منصوبہ بندی مربوط منصوبہ بندی اور پائیدار حکمت عملی کے تحت کی جارہی ہے تاکہ شہر کی بڑھتی ہوئی رئیل اسٹیٹ صنعت کو سہارا دیا جاسکے۔ انہوں نے کہا کہ شہری ترقی کے لیے معاشی اور ماحولیاتی منصوبہ بندی کے ساتھ ساتھ ہر برادری اور شعبے کی ضروریات کو مدنظر رکھا جارہا ہے، جبکہ عمان مستقبل کی ضروریات کو سامنے رکھتے ہوئے اسمارٹ ہاؤسنگ پر بھی توجہ دے رہا ہے۔ عمانی وزیر نے مزید کہا کہ پاکستانی کمپنیاں مسقط کے رئیل اسٹیٹ شعبے میں قابل قدر خدمات انجام دے رہی ہیں۔