اسلام آباد، 26 ستمبر 2026 (غفران): مانچسٹر سٹی کو پریمیئر لیگ کی جانب سے عائد کیے گئے 115 الزامات میں سے تقریباً تمام میں قصوروار قرار دیے جانے کی اطلاعات سامنے آئی ہیں، جو کلب کے خلاف کئی سال سے جاری مالیاتی قوانین کے مقدمے میں اہم پیش رفت ہے۔ رپورٹس کے مطابق مانچسٹر سٹی کو ایک کے علاوہ تمام الزامات میں قصوروار قرار دیا گیا ہے، تاہم کلب کے خلاف سزا کا فیصلہ ابھی نہیں کیا گیا۔ ممکنہ سزاؤں میں جرمانہ، پوائنٹس کی کٹوتی یا دیگر کھیلوں سے متعلق پابندیاں شامل ہوسکتی ہیں۔ مانچسٹر سٹی نے تمام الزامات مسترد کرتے ہوئے اپنے دفاع پر قائم رہنے کا اعلان کیا ہے اور مؤقف اختیار کیا ہے کہ قانونی کارروائی ابھی مکمل نہیں ہوئی اور کئی اہم مراحل باقی ہیں۔ کلب کی جانب سے فیصلے کے خلاف اپیل کیے جانے کی بھی توقع ہے۔ الزامات کا تعلق کلب کے مالی معاملات، آمدنی، اسپانسرشپ سے حاصل ہونے والی رقوم اور کھلاڑیوں و مینیجرز کو ادائیگیوں سے متعلق مبینہ مالیاتی خلاف ورزیوں سے ہے۔ پریمیئر لیگ نے مانچسٹر سٹی پر تحقیقات میں تعاون نہ کرنے کا الزام بھی عائد کیا ہے۔ اب توجہ کلب کے خلاف ممکنہ سزا اور مستقبل کے مقابلوں میں اس کی شرکت پر پڑنے والے اثرات پر مرکوز ہے۔ مانچسٹر سٹی کے خلاف ممکنہ کارروائی کی نوعیت اور سزا کی شدت تاحال واضح نہیں، جبکہ قانونی کارروائی میں مزید پیش رفت کے بعد صورتحال واضح ہونے کی توقع ہے۔