لاہور، 24 اگست 2026 (غفران): پاکستان ویمنز کرکٹ ٹیم کی کپتان فاطمہ ثنا نے کہا ہے کہ قومی ٹیم آئندہ ایشیا کپ میں کسی ایک میچ کو ترجیح دینے کے بجائے ہر مقابلے کو یکساں اہمیت کے ساتھ کھیلے گی۔ لاہور میں پیر کو پریس کانفرنس کرتے ہوئے فاطمہ ثنا نے کہا کہ ایشیا کپ کے لیے قومی ٹیم کی تیاریاں بھرپور انداز میں جاری ہیں اور کھلاڑی پورے ٹورنامنٹ میں مستقل اور عمدہ کارکردگی دکھانے کے لیے پرعزم ہیں۔ پاکستانی کپتان نے کہا کہ ہمارے لیے ایشیا کپ کا ہر میچ اہم ہے، اس لیے ٹیم کی توجہ ہر مقابلے پر مرکوز رہے گی۔ فاطمہ ثنا نے کہا کہ دبئی کے موسمی اور کھیل کے حالات سے واقفیت ٹورنامنٹ کے دوران قومی ٹیم کے لیے فائدہ مند ثابت ہوگی۔ انہوں نے بتایا کہ کھلاڑیوں نے گزشتہ سیریز کی خامیوں کا جائزہ لیا ہے اور آئندہ ان غلطیوں کو دہرانے سے گریز کیا جائے گا۔ پاکستانی کپتان نے انگلینڈ کی دی ہنڈرڈ لیگ میں اپنے تجربے کا بھی ذکر کیا اور کہا کہ اس ٹورنامنٹ میں شرکت نے بطور کرکٹر ان کی صلاحیتوں کو نکھارنے میں نمایاں کردار ادا کیا۔ انہوں نے انگلش مقابلے میں شرکت کرنے والی پہلی پاکستانی خاتون کرکٹر بننے کو اپنے لیے باعثِ فخر قرار دیا۔ فاطمہ ثنا نے امید ظاہر کی کہ بیرون ملک لیگز میں پاکستانی خواتین کرکٹرز کی عمدہ کارکردگی سے ملک کی مزید کھلاڑیوں کے لیے معروف بین الاقوامی لیگز میں جگہ بنانے کے مواقع پیدا ہوں گے۔ انہوں نے کہا کہ بیرون ملک اعلیٰ سطح کی مسابقتی کرکٹ کھیلنے سے کھلاڑیوں کو قیمتی تجربہ حاصل ہوتا ہے، جو بالآخر پاکستان کی قومی ویمنز ٹیم کے لیے بھی فائدہ مند ثابت ہوسکتا ہے۔