اسلام آباد، 4 اکتوبر 2026 (کامران راجہ): صومالیہ میں جاں بحق ہونے والے تین پاکستانی شہریوں کی میتیں ایتھوپیا کے دارالحکومت ادیس ابابا پہنچ گئی ہیں، جہاں سے انہیں وطن واپس لانے کے لیے انتظامات کو حتمی شکل دی جا رہی ہے۔ وزیراعظم شہباز شریف کی ہدایت پر میتوں کی وطن واپسی کا عمل جاری ہے اور متعلقہ حکام ضروری قانونی و انتظامی کارروائیاں مکمل کر رہے ہیں۔ سید کاشف عمر، احمد انصاری اور رفیع اللہ کی میتیں ادیس ابابا پہنچ چکی ہیں اور ضروری کلیئرنس ملنے کے بعد انہیں کراچی منتقل کیا جائے گا۔ ایتھوپین ایئرلائنز کے حکام میتوں کے تابوتوں کا معائنہ اور ضروری انتظامات کا جائزہ لے رہے ہیں، جس کے بعد کراچی کے لیے روانگی کی حتمی منظوری دی جائے گی۔ وزیراعظم شہباز شریف نے متعلقہ حکام کو تینوں میتوں کی جلد از جلد پاکستان واپسی یقینی بنانے کی ہدایت کی ہے اور سوگوار خاندانوں کو ہر ممکن تعاون کی یقین دہانی کرائی ہے۔ وزیراعظم نے مرحوم سید کاشف عمر کے صاحبزادے اذہان کاشف سے ٹیلی فون پر رابطہ کرکے ان کے والد کے انتقال پر تعزیت بھی کی۔ متعلقہ حکام ایتھوپین ایئرلائنز اور دیگر اداروں کے ساتھ مسلسل رابطے میں ہیں تاکہ باقی ماندہ کارروائیاں مکمل کرکے میتوں کو جلد از جلد کراچی پہنچایا جا سکے۔