راولپنڈی، 23 اگست 2026 (غفران): پنجاب حکومت نے راولپنڈی کے شہریوں کو صاف اور محفوظ پینے کا پانی فراہم کرنے کے لیے ایک بڑے منصوبے کی منظوری دے دی ہے، جس کے تحت ڈڈوچہ ڈیم پر سرفیس واٹر ٹریٹمنٹ پلانٹ اور واٹر سپلائی سسٹم تعمیر کیا جائے گا۔ منصوبہ مکمل ہونے کے بعد راولپنڈی شہر اور کینٹونمنٹ علاقوں کو روزانہ 3 کروڑ 50 لاکھ گیلن اضافی پانی فراہم کیا جائے گا۔ منصوبے کی مجموعی لاگت 36 ارب روپے ہے اور اسے دسمبر 2029 تک مکمل کرنے کا ہدف مقرر کیا گیا ہے۔ راولپنڈی کے کمشنر کے مطابق ڈڈوچہ ڈیم سے روزانہ 35 ملین گیلن صاف پانی سپلائی سسٹم میں شامل کیا جائے گا، جس سے شہریوں کو پینے کے صاف پانی کی فراہمی میں بہتری آئے گی۔ ڈیم کی تکمیل کے بعد واسا (WASA) ٹرانسمیشن لائن اور واٹر سپلائی نیٹ ورک پر کام کرے گا۔ ڈڈوچہ ڈیم کی تعمیراتی سرگرمیاں 92 فیصد مکمل ہوچکی ہیں اور یہ منصوبہ محکمہ آبپاشی پنجاب کے تحت تعمیر کیا جا رہا ہے۔ تاہم ڈیم سے راولپنڈی تک 28 کلومیٹر طویل ٹرانسمیشن لائن، واٹر فلٹریشن پلانٹ اور شہر و کینٹونمنٹ علاقوں میں پانی کی تقسیم کے لیے نیٹ ورک دسمبر 2029 تک مکمل کیا جائے گا۔ پنجاب حکومت راولپنڈی شہر سے متعلق منصوبے کے اخراجات کی مد میں 18 ارب روپے فراہم کرے گی، جبکہ کینٹونمنٹ علاقے کے لیے مختص مزید 18 ارب روپے کے اخراجات کی ذمہ داری پنجاب کابینہ کے اجلاس میں طے کی جائے گی۔ توقع ہے کہ یہ رقم وفاقی یا پنجاب حکومت میں سے کوئی ایک برداشت کرے گی۔ منصوبے کی تکمیل سے راولپنڈی شہر اور ملحقہ کینٹونمنٹ علاقوں میں صاف پینے کے پانی کی دستیابی میں نمایاں بہتری آنے کی توقع ہے۔