میلبورن، 11 اکتوبر 2026 (غفران): کینیا کے دو مرتبہ اولمپک چیمپئن ایلیوڈ کیپچوگے نے اتوار کو میلبورن میراتھن جیت کر نیا کورس ریکارڈ قائم کردیا۔ 41 سالہ ایتھلیٹ نے دو گھنٹے، 9 منٹ اور 10 سیکنڈ میں فاصلہ طے کرتے ہوئے اپنے کیریئر کی 17ویں میراتھن فتح حاصل کی۔ یہ 2023 میں برلن میراتھن جیتنے کے بعد ان کی پہلی کامیابی ہے۔ کیپچوگے دو سال کے دوران دنیا کے ساتوں براعظموں میں میراتھن دوڑنے کے ہدف پر کام کررہے ہیں، جس کا آغاز انہوں نے مئی میں کیپ ٹاؤن میراتھن سے کیا تھا۔ آسٹریلیا کے تھامس ڈو کانٹو نے دو گھنٹے، 10 منٹ اور 35 سیکنڈ کے وقت کے ساتھ دوسری جبکہ ان کے ہم وطن ریس ایڈورڈز نے دو گھنٹے، 14 منٹ اور 33 سیکنڈ میں دوڑ مکمل کرکے تیسری پوزیشن حاصل کی۔ خواتین کی دوڑ میں نیوزی لینڈ کی کمیل فرنچ نے دو گھنٹے، 28 منٹ اور 25 سیکنڈ کے وقت کے ساتھ پہلی پوزیشن حاصل کی، جبکہ آسٹریلیا کی سینیڈ ڈائیور دوسرے اور آئرلینڈ کی نکولا شیریڈن تیسرے نمبر پر رہیں۔