یروشلم، 26 اکتوبر 2026 (نوشین): اسرائیلی میڈیا کی رپورٹس کے مطابق وزیراعظم بنجمن نیتن یاہو اور فوج کے سربراہ ایال زامیر کے درمیان ایران کے خلاف ممکنہ فوجی کارروائی پر اختلافات پیدا ہو گئے ہیں، جس سے اسرائیل میں 27 اکتوبر کو ہونے والے پارلیمانی انتخابات سے قبل تہران کے ساتھ تصادم کا خدشہ بڑھ سکتا ہے۔ انادولو کے حوالے سے سامنے آنے والی رپورٹس میں کہا گیا ہے کہ ایال زامیر نے مجوزہ فوجی کارروائی پر تفصیلی مشاورت اور کسی بھی اقدام سے قبل سیاسی قیادت سے باضابطہ قانونی منظوری لینے پر زور دیا۔ مجوزہ کارروائی کی نوعیت ظاہر نہیں کی گئی، تاہم اسرائیلی میڈیا کے ذرائع نے خدشہ ظاہر کیا کہ ایران کے ساتھ کشیدگی میں اضافہ انتخابی مقاصد کے لیے استعمال ہو سکتا ہے اور موجودہ حساس سیاسی و سکیورٹی صورتحال میں وسیع تر تصادم کا سبب بن سکتا ہے۔ وزیراعظم نیتن یاہو نے اتوار کو اسرائیلی چینل 14 کو انٹرویو دیتے ہوئے ایال زامیر کے ساتھ اختلافات کی خبروں کو مسترد کیا اور انہیں ’’بکواس‘‘ قرار دیتے ہوئے کہا کہ ان کے درمیان کوئی جھگڑا نہیں ہوا۔ اسرائیلی وزیرِ دفاع اسرائیل کاٹز نے بھی پیر کو سماجی رابطے کے پلیٹ فارم ایکس پر بیان میں ایران سے متعلق پالیسی پر سیاسی قیادت اور اسرائیلی دفاعی افواج کے درمیان اختلافات کی خبروں کو ’’بالکل بے بنیاد اور جھوٹا‘‘ قرار دیا۔ کاٹز کے مطابق سیاسی اور فوجی قیادت کے درمیان مکمل ہم آہنگی موجود ہے اور اسرائیل کا انتخابات سے قبل ایران پر حملہ کرنے کا کوئی ارادہ نہیں۔ تاہم، اپوزیشن رہنما یائر لاپڈ نے اتوار کو ایکس پر اپنے بیان میں ان رپورٹس کا حوالہ دیتے ہوئے نیتن یاہو پر الزام لگایا کہ وہ انتخابات ملتوی کرانے کے لیے ایران کے ساتھ کشیدگی اور تصادم کو ہوا دینا چاہتے ہیں۔ نیتن یاہو نے اپنی انتخابی مہم میں قومی سلامتی کو مرکزی اہمیت دی ہے اور مؤقف اختیار کیا ہے کہ ایران کے ساتھ جاری امریکی اسرائیلی تنازع میں اسرائیل کے مقاصد حاصل کرنے کے لیے وہی بہترین قیادت فراہم کر سکتے ہیں۔ یہ الزامات اور تردیدیں ایسے وقت سامنے آئی ہیں جب اسرائیل علاقائی کشیدگی اور سخت انتخابی مقابلے کے ماحول میں پارلیمانی انتخابات کی جانب بڑھ رہا ہے۔