تہران، 13 ستمبر(غفران) 2026: ایرانی وزیر خارجہ عباس اراغچی نے کہا ہے کہ پیر کو عمان میں ہونے والے مذاکرات میں آبنائے ہرمز کے ذریعے نئے مجوزہ بحری راستے پر توجہ مرکوز کی جائے گی۔ عرب ٹی وی چینل کو انٹرویو دیتے ہوئے اراغچی نے کہا کہ ایران عمان کے ساتھ ہونے والے معاہدے کی تفصیلات کے ساتھ مجوزہ بحری راستے کا نقشہ بھی پیش کرے گا۔ انہوں نے واضح کیا کہ عمان کے ساتھ معاہدے کو آبنائے ہرمز دوبارہ کھولنے کے فیصلے کے طور پر نہیں دیکھا جانا چاہیے، کیونکہ آبنائے ہرمز کھولنے سے قبل امریکا کو اسلام آباد میں طے پانے والی مفاہمتی یادداشت پر عمل کرنا ہوگا۔ ایرانی وزیر خارجہ نے مزید کہا کہ خطے میں سلامتی اور استحکام برقرار رکھنے کی ذمہ داری صرف خطے کے ممالک پر عائد ہوتی ہے اور امید ظاہر کی کہ عمان مذاکرات اہم علاقائی امور پر مستقبل میں وسیع تر مشاورت کی راہ ہموار کریں گے۔ آبنائے ہرمز ایک انتہائی اہم بحری گزرگاہ ہے جو خلیج فارس کو خلیج عمان اور وسیع تر بحیرہ عرب سے ملاتی ہے، جبکہ بحری آمدورفت میں کسی بھی قسم کی رکاوٹ عالمی توانائی کی منڈیوں اور بین الاقوامی جہاز رانی پر نمایاں اثرات مرتب کر سکتی ہے۔