صنعا، 4 اکتوبر 2026 (کامران راجہ): یمنی فوج نے دعویٰ کیا ہے کہ ملک کے مختلف محاذوں پر کی جانے والی 257 فوجی کارروائیوں کے دوران کم از کم 700 حوثی جنگجو ہلاک کیے گئے۔ یمنی فوج کے ترجمان کرنل ماجد النزیلی نے ایک بیان میں کہا کہ سرکاری فورسز نے ان کارروائیوں میں لڑاکا طیاروں، ڈرونز، توپ خانے، میزائلوں اور راکٹ لانچرز کا استعمال کیا۔ انہوں نے بتایا کہ کارروائیاں صنعا، میدی، باقم، الجوف، مارب، البیضا اور لحج کے محاذوں پر کی گئیں جبکہ تعز کے محاذوں پر اہم فوجی کارروائیاں کی گئیں۔ ترجمان کے مطابق کارروائیوں میں حوثیوں کے کمانڈ اینڈ کنٹرول مراکز، فوجی دستوں کے اجتماعات، عسکری سازوسامان اور ذخائر، اسلحہ و گولہ بارود کے ڈپو، فوجی رسد کے راستوں اور نقل و حمل کے نیٹ ورک کو نشانہ بنایا گیا۔ ابتدائی جنگی جائزوں کے مطابق کارروائیوں میں کم از کم 700 حوثی جنگجو ہلاک جبکہ 170 فوجی گاڑیاں اور دیگر عسکری سازوسامان تباہ کیا گیا، اس کے علاوہ کئی اہم اور اسٹریٹجک فوجی اہداف کو بھی نشانہ بنایا گیا۔ دوسری جانب یمن میں قانونی حکومت کی حمایت کرنے والے اتحاد نے حوثیوں کے اس دعوے کو گمراہ کن قرار دیا ہے کہ انہوں نے سعودی دارالحکومت ریاض کو نشانہ بنایا۔ اتحاد کے ترجمان نے کہا کہ یہ دعوے حوثیوں کو ہونے والے نقصانات اور ان کے اقدامات کے خلاف بڑھتے ہوئے عوامی غم و غصے سے توجہ ہٹانے کی کوشش ہیں۔ ایرانی حمایت یافتہ حوثیوں نے ریاض کو نشانہ بنانے کا دعویٰ اس وقت کیا جب متحدہ یمنی فورسز مغربی ساحل پر حوثیوں کی جانب سے قبضہ مضبوط کرنے کی کوششوں کو ناکام بنانے کے لیے کارروائیوں میں مصروف تھیں۔