میونخ، 19 ستمبر 2026 (نوشین): بائرن میونخ کے فارورڈ ہیری کین نے یونین برلن کے خلاف جمعہ کو کھیلے گئے میچ میں اپنے 98ویں لیگ میچ میں 100 گولز مکمل کرکے بنڈس لیگا میں یہ سنگِ میل تیز ترین عبور کرنے والے کھلاڑی کا اعزاز حاصل کر لیا۔ ہیری کین نے 39ویں منٹ میں گول کیپر فریڈرک رونّو کو شکست دیتے ہوئے پنالٹی پر بائرن میونخ کی جانب سے دوسرا گول کیا، جبکہ 54ویں منٹ میں ایک اور گول اسکور کیا۔ اس سے قبل کولون کے ڈیٹر مولر کے پاس یہ ریکارڈ تھا، جنہوں نے 1970 کی دہائی کے اوائل میں 129 میچوں میں 100 گول مکمل کیے تھے۔ یورپ کی پانچ بڑی لیگز میں صرف کرسٹیانو رونالڈو نے 100 لیگ گولز اس سے کم میچوں میں مکمل کیے، انہوں نے 2010 کی دہائی کے اوائل میں ریال میڈرڈ کی جانب سے 92 لا لیگا میچوں میں یہ سنگِ میل عبور کیا تھا۔ 2023 میں بائرن میونخ میں شمولیت کے بعد ہیری کین نے اپنی تینوں بنڈس لیگا سیزنز میں سب سے زیادہ گول کرنے والے کھلاڑی کا اعزاز حاصل کیا، 2023-24 میں 36، 2024-25 میں 26 اور 2025-26 میں 36 گول کیے۔ وہ 2024 اور 2026 میں دو مرتبہ یورپی گولڈن بوٹ بھی جیت چکے ہیں۔ کین نے رواں سیزن میں گزشتہ ہفتے ایلورسبرگ کے خلاف بائرن میونخ کی 2-1 سے کامیابی میں فیصلہ کن گول کرکے اپنی گول اسکورنگ کا آغاز کیا تھا۔