استنبول — 6 ستمبر 2026 (نیوز ڈیسک) — مقبول تاریخی ڈرامہ سیریز کورولوش عثمان میں میخائل کوسیس کا کردار ادا کرنے والے معروف ترک اداکار سیرحت مصطفیٰ کلیچ استنبول میں اپنے گھر میں مردہ پائے گئے۔ 51 سالہ اداکار کو 5 ستمبر کو استنبول کے کاگتھانے ضلع میں واقع ایک اپارٹمنٹ میں ان کی دوست اوزلم ای نے کرسی پر بے حس و حرکت پایا۔ رپورٹس کے مطابق اوزلم ای 3 ستمبر سے اداکار سے رابطہ کرنے کی کوشش کر رہی تھیں اور کوئی جواب نہ ملنے پر وہ ان کی خیریت دریافت کرنے گھر پہنچیں۔ اداکار کو سانس نہ لیتے دیکھ کر انہوں نے فوری طور پر امدادی اداروں کو اطلاع دی، جس کے بعد طبی ٹیمیں موقع پر پہنچیں اور ان کی موت کی تصدیق کی۔ اداکار کی دوست نے پولیس کو بتایا کہ سیرحت کلیچ لمفیٹک کینسر میں مبتلا تھے۔ پولیس نے اداکار کی پراسرار موت کی تحقیقات شروع کر دی ہیں۔ ابتدائی معائنے میں جسم پر تشدد یا کسی کھلے زخم کے واضح نشانات نہیں ملے، جبکہ موت کی اصل وجہ معلوم کرنے کے لیے حکام نے لاش کو پوسٹ مارٹم کے لیے اسپتال منتقل کر دیا ہے۔ 1975 میں پیدا ہونے والے سیرحت مصطفیٰ کلیچ ترکی کے معروف فلم، ٹیلی ویژن اور تھیٹر اداکار تھے، جنہوں نے 1998 میں تھیٹر سے اپنے فنی سفر کا آغاز کیا۔ انہوں نے کورولوش عثمان، محرم سلطان: کوسم سمیت متعدد ٹی وی اور فلمی منصوبوں میں کام کیا۔ ان کی فلم کِش اویُوسُو نے 2014 میں کانز فلم فیسٹیول میں پام ڈی اور ایوارڈ حاصل کیا۔ اداکار نے ٹیلی ویژن، فلم اور تھیٹر میں اپنی شاندار اداکاری کے باعث ترکی سمیت دنیا بھر میں مداحوں کی بڑی تعداد بنائی۔