
لاہور، 21 نومبر 2026 (کامران راجہ): پاکستان کرکٹ بورڈ (پی سی بی) نے 30 جون 2027 تک کے لیے 38 کھلاڑیوں کے نئے سینٹرل کنٹریکٹس کا اعلان کردیا ہے، جس میں محمد رضوان، سابق ٹیسٹ کپتان شان مسعود اور اوپنر صائم ایوب سمیت کئی اہم کھلاڑیوں کو شامل نہیں کیا گیا۔ دیگر نمایاں کھلاڑیوں میں حسن علی، عبداللہ شفیق، محمد وسیم جونیئر، نعمان علی اور محمد حارث بھی فہرست سے باہر ہیں۔ نئے فارمیٹ پر مبنی نظام کے تحت کھلاڑیوں کو ٹیسٹ اور ون ڈے، صرف ٹیسٹ، ون ڈے اور ٹی 20 انٹرنیشنل، جبکہ صرف ٹی 20 انٹرنیشنل کی چار کیٹیگریز میں تقسیم کیا گیا ہے، اس کے علاوہ 19 ابھرتے ہوئے کھلاڑیوں کے لیے ڈیولپمنٹ کیٹیگری بھی متعارف کرائی گئی ہے۔ بابر اعظم اور سلمان علی آغا وہ واحد دو کھلاڑی ہیں جنہیں ٹیسٹ اور ون ڈے دونوں فارمیٹس کے کنٹریکٹس دیے گئے ہیں۔ پی سی بی کے مطابق نئے نظام کا مقصد کھلاڑیوں کو ان فارمیٹس پر توجہ مرکوز کرنے کا موقع دینا ہے جن میں ان سے قومی ٹیم کی نمائندگی کی توقع ہے۔ ڈائریکٹر ہائی پرفارمنس عاقب جاوید نے واضح کیا کہ سینٹرل کنٹریکٹ کا کھلاڑیوں کے انتخاب پر کوئی اثر نہیں پڑے گا، جبکہ ہیڈ کوچ مائیک ہیسن کا کہنا تھا کہ نئے نظام سے کھلاڑی اپنی ممکنہ بین الاقوامی ذمہ داریوں پر بہتر توجہ دے سکیں گے۔