پشاور، 29 اگست 2026 (نوشین): پشاور میں عسکریت پسندوں کی جانب سے متانی پولیس اسٹیشن پر ڈرون کے ذریعے حملے کی کوشش کو مؤثر سکیورٹی انتظامات کے باعث ناکام بنا دیا گیا۔ پشاور کے کیپیٹل سٹی پولیس آفیسر (سی سی پی او) میاں سعید کے مطابق پولیس کو ایسی فوٹیج بھی حاصل ہوئی ہے جس میں ڈرون کے ذریعے پولیس اسٹیشن کو نشانہ بنانے کے لیے دھماکا خیز مواد گرایا جاتا دکھائی دے رہا ہے۔سی سی پی او نے بتایا کہ پولیس اسٹیشن کے اطراف نصب حفاظتی رکاوٹ نے دھماکا خیز مواد کو تھانے کے احاطے کے اندر گرنے سے روک دیا، جس کے باعث حملے کی کوشش ناکام ہوگئی۔ میاں سعید کے مطابق واقعے میں کوئی جانی نقصان نہیں ہوا۔ انہوں نے کہا کہ گردونواح کے پولیس اسٹیشنز کی سکیورٹی مزید مضبوط بنانے کے لیے اقدامات کیے جا رہے ہیں۔ ممکنہ ڈرون حملوں سے تحفظ کے لیے حساس اور کمزور پولیس تنصیبات کے اطراف خصوصی حفاظتی رکاوٹیں نصب کی جائیں گی۔ حکام کے مطابق واقعے کے بعد علاقے میں حساس اور اہم پولیس تنصیبات کی سکیورٹی مزید سخت کر دی گئی ہے۔