اسلام آباد، 2 اکتوبر 2026 (غفران): پاکستان نے علاقائی تنازعات کے حل کے لیے مذاکرات اور سفارت کاری کے عزم کا اعادہ کرتے ہوئے سندھ طاس معاہدے سے متعلق حالیہ ثالثی عدالت کے فیصلے پر شکوک و شبہات پیدا کرنے کی بھارتی کوششوں کو مسترد کر دیا ہے۔ دفتر خارجہ کے ترجمان سفیر سجاد حیدر خان نے اسلام آباد میں ہفتہ وار میڈیا بریفنگ کے دوران کہا کہ پاکستان قواعد پر مبنی بین الاقوامی نظام کے لیے پرعزم ہے اور خطے میں امن و استحکام یقینی بنانے کے لیے مذاکرات اور سفارت کاری ہی قابل عمل ذرائع ہیں۔ سندھ طاس معاہدے کے حوالے سے ترجمان نے ثالثی عدالت کو ’’غیر قانونی طور پر تشکیل دی گئی‘‘ قرار دینے کے بھارتی مؤقف کو مسترد کرتے ہوئے کہا کہ عدالت نے متفقہ طور پر واضح کیا ہے کہ معاہدہ بدستور مکمل طور پر نافذ العمل اور دونوں فریقوں کے لیے پابند ہے۔ انہوں نے کہا کہ عدالت نے یہ بھی قرار دیا ہے کہ بھارت مغربی دریاؤں پر پن بجلی منصوبوں کے ڈیزائن اور آپریشن سے متعلق معاہدے کی ذمہ داریوں کی پابندی کا پابند ہے۔ ترجمان نے بتایا کہ عدالت نے رتلے ہائیڈرو الیکٹرک پاور منصوبے کے مخصوص حصوں میں کنکریٹ ڈالنے پر پابندی عائد کی ہے، جو غیر جانب دار ماہر کے حتمی فیصلے کے 90 روز بعد تک برقرار رہے گی، جبکہ حتمی فیصلہ جولائی 2027 کے آس پاس متوقع ہے۔ عدالت نے منصوبے سے متعلق رپورٹنگ کا اقدام بھی مقرر کیا ہے۔ انہوں نے کہا کہ ثالثی عدالت سندھ طاس معاہدے کے تحت دی ہیگ میں قائم مستقل ثالثی عدالت کے تحت تشکیل دی گئی تھی اور اس سے قبل معاہدے کے مطابق اپنے دائرہ اختیار اور تشکیل کا تعین بھی کر چکی ہے۔ ترجمان نے کہا کہ ’’بھارت یکطرفہ بیانات کے ذریعے ثالثی عدالت کے پابند فیصلوں سے بچ نہیں سکتا۔‘‘ پاکستان اور افغانستان کے تعلقات کے حوالے سے سفیر سجاد حیدر خان نے کہا کہ پاکستان افغانستان کے ساتھ دوستانہ اور تعاون پر مبنی تعلقات کے فروغ کا خواہاں ہے، تاہم ایسے تعلقات اعتماد، باہمی مفاہمت اور ایک دوسرے کی خودمختاری کے احترام کی بنیاد پر ہی قائم ہو سکتے ہیں۔ انہوں نے کہا کہ افغانستان سے دہشت گردی کے حوالے سے پاکستان کے تحفظات اب ’’ریڈ لائن‘‘ بن چکے ہیں، خصوصاً اس لیے کہ دہشت گرد سرگرمیاں سرحدی علاقوں سے نکل کر خیبر پختونخوا اور بلوچستان کے اندرونی علاقوں تک پھیل گئی ہیں۔ انہوں نے کہا کہ پاکستان مذاکرات کے لیے تیار ہے، تاہم اسلام آباد افغان سرزمین سے دہشت گرد تنظیموں کی دراندازی اور سرگرمیوں کے مکمل خاتمے کا خواہاں ہے، جن کے بارے میں پاکستان کا مؤقف ہے کہ انہیں افغان سرزمین سے حمایت اور سہولت فراہم کی جا رہی ہے۔ شنگھائی تعاون تنظیم کے اجلاس میں پاکستان اور بھارت کے رابطوں کے حوالے سے ترجمان نے اسلام آباد میں ہونے والے حالیہ ایس سی او اجلاس میں بھارت کے قومی رابطہ کار کی شرکت کو خوش آئند قرار دیا۔