کراچی، 13 ستمبر 2026 (غفران): متحدہ قومی موومنٹ (ایم کیو ایم) کے رہنما ڈاکٹر فاروق ستار نے نئے صوبوں اور انتظامی یونٹس کے قیام کے لیے ملک گیر عوامی ریفرنڈم کرانے کا مطالبہ کرتے ہوئے کہا ہے کہ یہ اقدام پاکستان کی سیاسی، معاشی اور سماجی ترقی کے لیے ضروری ہے۔ گریجویٹ فورم پاکستان کے زیر اہتمام نیشنل ڈائیلاگ سے خطاب کرتے ہوئے فاروق ستار نے کہا کہ موجودہ چاروں صوبے بامعنی سیاسی اور انتظامی اصلاحات فراہم کرنے میں ناکام رہے ہیں اور اختیارات چند خاندانوں تک محدود ہو کر رہ گئے ہیں۔ انہوں نے کہا کہ پاکستان معاشی، سیاسی اور سماجی طور پر خودمختار نہیں ہوسکا اور 18ویں آئینی ترمیم کے بعد بہتر طرز حکمرانی کی توقعات بھی پوری نہیں ہوئیں۔ فاروق ستار نے بتایا کہ ایم کیو ایم پاکستان نے مقامی حکومتوں کے اختیارات واضح کرنے کے لیے آئینی ترمیمی بل جمع کرایا ہے اور ٹیکنالوجی و مصنوعی ذہانت کے تیزی سے ترقی کرتے دور میں مؤثر مقامی نظام حکومت کی ضرورت پر زور دیا۔ انہوں نے سندھ کو شمالی، وسطی، جنوبی، مغربی اور مشرقی سندھ میں تقسیم کرنے کی تجویز دیتے ہوئے کراچی کو سندھ کے اندر خصوصی حیثیت دینے اور صوبے کے شہروں و دیہات کو براہ راست انتظامی اختیارات اور وسائل فراہم کرنے کا مطالبہ کیا۔ انہوں نے جمہوری حکومتوں کی جانب سے مقامی حکومتوں کے نظام کو کمزور یا ختم کرنے پر تنقید کرتے ہوئے کہا کہ مارشل لا کے ادوار میں بھی مقامی حکومتیں کام کرتی رہی ہیں۔ فاروق ستار نے آرٹیکل 48 کی شق 6 کے تحت عوامی رائے حاصل کرنے کا مطالبہ کیا اور اعتماد ظاہر کیا کہ لاڑکانہ سمیت سندھ کے دیگر علاقوں کے عوام نئے انتظامی یونٹس کے قیام کی حمایت کریں گے۔ انہوں نے نئے صوبوں کے حق میں شاہراہ فیصل پر مشترکہ جلسہ منعقد کرنے کی تجویز بھی دی اور کہا کہ یہ معاملہ پاکستان کی بقا، سلامتی اور خوشحالی سے جڑا ہوا ہے۔