راولپنڈی، 29 ستمبر, 2026 (نوشین): ٹریفک پولیس نے مری روڈ پر شہری اور موٹر سائیکل سوار کو گاڑی سے گھسیٹنے کے واقعے پر نیو ٹاؤن تھانے میں مقدمہ درج کر لیا ہے، جبکہ پولیس نے واقعے سے متعلق مزید تفصیلات بھی سامنے لائی ہیں۔ پولیس کے مطابق واقعہ جمعہ کی رات تقریباً ساڑھے 11 بجے پیش آیا اور گاڑی کی ونڈ اسکرین پر نظر آنے والا شخص موٹر سائیکل کا مالک نہیں تھا۔ پولیس نے بتایا کہ ایک سیاہ رنگ کی گاڑی نے سفید گاڑی کو پیچھے سے ٹکر ماری، جس کے بعد سفید گاڑی کے مالک نے گاڑی روکنے کی کوشش کی، تاہم سیاہ گاڑی کے ڈرائیور نے مبینہ طور پر اسے کچلنے کی کوشش کی۔ اپنی جان بچانے کے لیے سفید گاڑی کا مالک گاڑی کے بونٹ پر چڑھ گیا اور جب گاڑی نہ رکی تو ونڈ اسکرین کو پکڑ لیا۔ پولیس کے مطابق ڈرائیور نے گاڑی چلانا جاری رکھا اور راستے میں آنے والی ایک موٹر سائیکل کو بھی گاڑی کے ساتھ گھسیٹتا رہا۔ شہریوں نے گاڑی کا تعاقب کرکے اسے روک لیا اور متاثرہ شہری کو بچا لیا، جبکہ ایمرجنسی ہیلپ لائن 15 پر کال کے بعد صادق آباد پولیس کی موبائل ٹیم موقع پر پہنچ گئی۔ پولیس کے مطابق اہلکار نے ابتدا میں تینوں فریقین کے درمیان صلح کروا دی تھی، تاہم واقعے کی ویڈیو سوشل میڈیا پر وائرل ہونے کے بعد ٹریفک پولیس نے نیو ٹاؤن تھانے میں مقدمہ درج کر لیا۔ صادق آباد تھانے کے ڈیوٹی افسر نے تینوں فریقین کو نیو ٹاؤن تھانے طلب کر لیا ہے۔