استنبول، 7 نومبر 2026 (نوشین): ترک صدر رجب طیب اردوان نے مقبوضہ فلسطینی علاقوں میں اسرائیلی کارروائیوں پر عالمی برادری کی خاموشی اور عدم توجہی پر شدید تنقید کرتے ہوئے خبردار کیا ہے کہ عالمی بے حسی کے باعث فلسطینیوں کے خلاف مظالم میں مزید شدت آ رہی ہے۔ استنبول کانگریس سینٹر میں ٹی آر ٹی ورلڈ فورم 2026 کی افتتاحی تقریب سے خطاب کرتے ہوئے اردوان نے کہا کہ فلسطینیوں کو ان کی آبائی سرزمین سے جبری طور پر بے دخل کرنے کی کوششیں کرنے والی قابض قوتوں کی دہشت گردی جدید دنیا کی خاموشی کے باعث روز بروز مزید بے باک ہوتی جا رہی ہے۔ انہوں نے کہا کہ غزہ میں انسانی المیے جاری ہیں جبکہ عالمی امن، سلامتی اور استحکام کے قیام کے ذمہ دار ادارے تماشائی بنے ہوئے ہیں، جیسا کہ ماضی میں روانڈا اور سربرینیتسا سمیت دیگر مقامات پر ہونے والے مظالم کے دوران دیکھا گیا۔ ترک صدر کے مطابق صرف اکتوبر کے مہینے میں مقبوضہ مغربی کنارے میں فلسطینیوں کے خلاف تین ہزار سے زائد حملے اور خلاف ورزیاں ریکارڈ کی گئیں۔ انہوں نے اکتوبر 2025 کے غزہ امن معاہدے پر عمل درآمد نہ ہونے پر بھی تشویش کا اظہار کیا، جس میں ترکیہ نے ثالثی کا کردار ادا کیا تھا، اور کہا کہ اسرائیل کے معاملے پر عالمی برادری کا رویہ دوہرے معیار کی واضح مثال ہے۔ اردوان نے زور دیا کہ بین الاقوامی تعلقات کی بنیاد معاہدوں کی پاسداری کے اصول پر قائم ہے، تاہم آج عالمی نظام کے تمام اصولوں اور ضابطوں کو پامال کیا جا رہا ہے۔ انہوں نے خبردار کیا کہ بڑھتی ہوئی طاقت کی کشمکش، بین الاقوامی قوانین سے انحراف اور عالمی اداروں کی ناکامی کے باعث دنیا ایک سنگین ساختی بحران سے گزر رہی ہے۔ ترک صدر نے فلسطین، یمن، سوڈان اور یوکرین سمیت مختلف خطوں میں جاری تنازعات کے پرامن اور سفارتی حل کے لیے ترکیہ کے عزم کا اعادہ کرتے ہوئے کہا کہ ان کا ملک انصاف اور حق کے دفاع میں اپنی آواز بلند کرتا رہے گا۔ دریں اثنا، فلسطینی خبر رساں ادارے وفا کے مطابق جمعے کے روز اسرائیلی فوج اور آبادکاروں نے مقبوضہ مغربی کنارے کے مختلف علاقوں میں فلسطینیوں پر حملے کیے، زیتون کی فصل توڑنے والے افراد کو نشانہ بنایا، رہائشی خیموں اور زرعی زمینوں کو آگ لگا دی اور متعدد علاقوں میں چھاپے مارے۔ اسرائیلی فوجیوں نے رام اللہ کے شمال مشرق میں واقع گاؤں ابو فلاح میں غیر ملکی کارکنوں اور صحافیوں کو وہاں سے جانے پر مجبور کیا، جو فلسطینی باشندوں کو اپنی زمینوں تک رسائی اور زیتون کی فصل کی کٹائی میں مدد فراہم کرنے کی کوشش کر رہے تھے۔ ایک اور واقعے میں جبل الرِّیسان کے قریب اسرائیلی آبادکاروں اور فوجیوں نے فلسطینیوں کی زیتون کی فصل کاٹنے میں مدد کرنے والے 15 غیر ملکی کارکنوں کو مبینہ طور پر تشدد کا نشانہ بنانے کے بعد حراست میں لے لیا۔