غزہ، 12 نومبر 2026 (غفران): جنوبی غزہ میں ناصر میڈیکل کمپلیکس پر اسرائیلی فضائی حملے کے نتیجے میں 6 فلسطینی شہید اور 20 سے زائد زخمی ہو گئے۔ غزہ کی سول ڈیفنس کے مطابق حملہ جمعرات کی صبح خان یونس کے مغربی علاقے میں واقع اسپتال کمپلیکس کی الیاسین عمارت کی دوسری منزل پر کیا گیا۔ اسپتال کے ڈائریکٹر نے بتایا کہ حملے سے انتہائی نگہداشت اور سرجیکل وارڈز کو بڑے پیمانے پر نقصان پہنچا۔ اسرائیلی آرمی ریڈیو نے اس حملے کو ٹارگٹ کلنگ کی کارروائی قرار دیا، تاہم اپنے دعوے کے حق میں مزید تفصیلات فراہم نہیں کیں۔ دوسری جانب بدھ کے روز غزہ شہر اور البریج پناہ گزین کیمپ میں اسرائیلی حملوں کے نتیجے میں مزید 5 فلسطینی شہید ہوئے، جبکہ ایک اور فلسطینی منگل کے روز اسرائیلی حملے میں زخمی ہونے کے بعد دم توڑ گیا۔ ایک علیحدہ اسرائیلی فضائی حملے میں 20 سالہ فلسطینی فٹ بال گول کیپر بھی شہید ہو گیا، جس نے اپنی شہادت سے صرف پانچ روز قبل ایتھلیٹس اور کھیلوں سے وابستہ حکام کی یاد میں منعقدہ فٹ بال ٹورنامنٹ کے فائنل میں حصہ لیا تھا۔ فلسطینی فٹ بال ایسوسی ایشن کے مطابق غزہ اسپورٹس کلب کے کپتان اور گول کیپر محمود کمال فارس عبدالملک منگل کے روز جنوبی غزہ شہر کے علاقے صبرہ میں اسرائیلی حملے کا نشانہ بنے۔ ان کی شہادت کے بعد اکتوبر 2023 سے اب تک شہید ہونے والے فلسطینی کھلاڑیوں اور کھیلوں سے وابستہ کارکنوں کی تعداد ایک ہزار 17 ہو گئی ہے۔ غزہ اسپورٹس کلب نے ہزار شہداء کپ کے غزہ اور شمالی غزہ ڈویژن میں دوسری پوزیشن حاصل کی تھی، جس کا فائنل 5 نومبر کو کھیلا گیا۔ یہ ٹورنامنٹ اسرائیلی جنگ اور کھیلوں کی سہولیات کی تباہی کے باعث طویل تعطل کے بعد منظم فٹ بال سرگرمیوں کی بحالی کی علامت تھا۔ 4 ستمبر کو شروع ہونے والے اس مقابلے میں غزہ، مقبوضہ مغربی کنارے اور لبنان کے فلسطینی پناہ گزین کیمپوں سے 200 سے زائد ٹیموں نے حصہ لیا۔ اس سے قبل فلسطینی فٹ بال ایسوسی ایشن نے ہفتے کے روز 15 سالہ محمد نضال برابخ کی شہادت کی بھی اطلاع دی تھی، جو النجمہ اسپورٹس اکیڈمی کے کھلاڑی تھے اور جنوبی غزہ کے علاقے المواصی میں دوستوں کے ساتھ فٹ بال کھیل رہے تھے کہ اسرائیلی فورسز نے انہیں گولی مار کر شہید کر دیا۔ تازہ فضائی حملہ 10 اکتوبر 2025 کو نافذ ہونے والے جنگ بندی معاہدے کی مسلسل خلاف ورزیوں کے دوران کیا گیا۔ اکتوبر 2023 سے غزہ پر اسرائیلی جنگ کے نتیجے میں 74 ہزار 600 سے زائد فلسطینی شہید اور تقریباً ایک لاکھ 76 ہزار زخمی ہو چکے ہیں، جن میں زیادہ تر خواتین اور بچے شامل ہیں۔ جنگ کے دوران غزہ کے تقریباً 90 فیصد بنیادی ڈھانچے کو بھی تباہ کر دیا گیا ہے۔