پشاور، 9 اکتوبر 2026 (کامران راجہ): سکیورٹی فورسز نے خیبر پختونخوا کے ضلع شمالی وزیرستان میں انٹیلی جنس معلومات کی بنیاد پر کارروائی کرتے ہوئے 7 دہشت گردوں کو ہلاک کر دیا۔ یہ کارروائی عزمِ استحکام کے وژن کے تحت جاری انسدادِ دہشت گردی کی کوششوں کا حصہ تھی۔ ذرائع کے مطابق کارروائی میں فتنۃ الخوارج سے تعلق رکھنے والے دہشت گردوں کو نشانہ بنایا گیا اور تمام 7 شدت پسند مارے گئے۔ کارروائی کے دوران دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا، جبکہ گروہ سے وابستہ ٹھکانوں کو بھی تباہ کر دیا گیا۔ ذرائع کا کہنا ہے کہ عزمِ استحکام کے تحت کارروائیاں اس وقت تک جاری رہیں گی جب تک بیرونی پشت پناہی سے ہونے والی دہشت گردی کا خاتمہ نہیں ہو جاتا۔ اس سے ایک روز قبل بھی سکیورٹی فورسز نے شمالی وزیرستان میں انٹیلی جنس معلومات کی بنیاد پر کارروائیاں کرتے ہوئے 4 سینئر کمانڈروں سمیت 9 دہشت گردوں کو ہلاک کیا تھا۔ یہ کارروائیاں پالنگ زئی، ندیم کوٹ اور کوٹ خزری کے علاقوں میں کی گئی تھیں، جہاں فتنۃ الخوارج سے وابستہ ٹھکانوں کو نشانہ بنایا گیا۔ ذرائع کے مطابق ہلاک ہونے والے چار کمانڈروں کی شناخت خالد رضا، کامران، موسیٰ اور مفتون کے نام سے ہوئی تھی۔ ان کارروائیوں کے دوران بھی بڑی مقدار میں اسلحہ اور گولہ بارود برآمد کیا گیا، جبکہ دہشت گردوں کے متعدد ٹھکانے تباہ کر دیے گئے۔ سکیورٹی فورسز کی یہ مسلسل کارروائیاں خطے میں دہشت گرد نیٹ ورکس کو ختم کرنے اور دہشت گردی کے خطرات کا سدباب کرنے کی کوششوں کا حصہ ہیں۔