شمالی غزہ میں اسرائیلی حملے میں حماس کا سینئر رہنما جاں بحق

قاہرہ، 29 ستمبر 2026 (کامران راجہ): اسرائیلی فضائی حملے میں شمالی غزہ کی پٹی میں حماس کے سینئر رہنما عزالدین البیک جاں بحق ہوگئے، اسرائیلی اور فلسطینی حکام کے مطابق یہ حملہ منگل کے روز کیا گیا۔ اسرائیلی وزیراعظم بنیامین نیتن یاہو اور وزیر دفاع اسرائیل کاٹز نے کہا کہ اسرائیلی فوج نے عزالدین البیک کو نشانہ بنایا اور انہیں ہلاک کیا، جبکہ ان کا الزام تھا کہ وہ حملوں کی منصوبہ بندی اور جنگجوؤں کی بھرتی میں ملوث تھے۔ حماس نے بھی اسرائیلی حملے میں عزالدین البیک کی ہلاکت کی تصدیق کی۔ طبی ذرائع کے مطابق حملہ علی الصبح غزہ شہر کے نصر محلے میں ایک رہائشی عمارت پر کیا گیا۔ محکمہ صحت کے حکام نے بتایا کہ حملے میں زخمی ہونے والا ایک اور شخص بھی بعد ازاں زخموں کی تاب نہ لاتے ہوئے دم توڑ گیا۔ اسرائیل نے حالیہ ہفتوں کے دوران غزہ میں حملوں میں اضافہ کیا ہے، جبکہ اسرائیلی فوج کا کہنا ہے کہ رواں ماہ حماس کے کم از کم 20 رہنماؤں کو ہلاک کیا گیا ہے۔ حماس نے اسرائیل کے ان الزامات کی تردید کی ہے کہ وہ حملوں کی منصوبہ بندی یا اپنے ہتھیاروں کے ذخیرے کو دوبارہ بحال کرنے کی کوشش کر رہی تھی اور اسرائیل پر غزہ معاہدے کو نقصان پہنچانے کا الزام عائد کیا ہے۔ گزشتہ سال امریکا کی ثالثی میں طے پانے والی جنگ بندی میں غزہ کی تعمیر نو کی بات کی گئی تھی، تاہم مذاکرات کار اسرائیلی فوج کے انخلا سمیت دیگر امور پر اتفاق نہیں کر سکے، جس کے باعث پیش رفت محدود رہی ہے۔ اسرائیلی فضائی حملے جاری ہیں، جبکہ فلسطینی محکمہ صحت کے مطابق جنگ بندی کے نفاذ کے بعد سے غزہ میں کم از کم 1,400 فلسطینی جاں بحق ہو چکے ہیں۔ فلسطینی حکام کے مطابق اکتوبر 2023 سے غزہ پر اسرائیلی حملوں میں 73,000 سے زائد افراد جاں بحق ہو چکے ہیں۔