راولپنڈی، 23 اکتوبر 2026 (کامران راجہ): چیف آف آرمی اسٹاف (سی او اے ایس) اور چیف آف ڈیفنس فورسز (سی ڈی ایف) فیلڈ مارشل سید عاصم منیر نے عوامی حمایت کے ساتھ دہشت گردی اور اس کے گمراہ کن نظریے کو شکست دینے کے عزم کا اظہار کرتے ہوئے کہا ہے کہ پاکستان دہشت گردی کے ناسور کے خاتمے کے لیے پرعزم ہے۔ فیلڈ مارشل منیر نے یہ بات پشاور کور ہیڈ کوارٹرز کے دورے کے دوران کہی، جہاں انہوں نے دہشت گردی کے خلاف جنگ میں پاکستان کے عوام، بالخصوص سکیورٹی فورسز کے شہداء اور غازیوں کی قربانیوں کو خراج تحسین پیش کیا۔ دورے کے دوران انہیں صوبے میں سکیورٹی کی موجودہ صورتحال، جاری انسداد دہشت گردی آپریشنز، سرحدی انتظامات اور تعینات فوجی دستوں کی آپریشنل تیاریوں کے بارے میں تفصیلی بریفنگ دی گئی۔ فیلڈ مارشل منیر نے افسران اور جوانوں کے بلند حوصلے، پیشہ ورانہ صلاحیتوں اور لگن کو سراہتے ہوئے انہیں تمام خطرات کا مؤثر مقابلہ کرنے کے لیے مسلسل چوکس رہنے اور اعلیٰ ترین آپریشنل تیاری برقرار رکھنے کی ہدایت کی۔ انہوں نے واضح کیا کہ بھارت کی سرپرستی میں سرگرم دہشت گرد تنظیموں کے خلاف کارروائیاں پوری قوت کے ساتھ جاری رکھی جائیں گی اور دہشت گردوں کو جہاں کہیں بھی موجود ہوں، سخت جواب دیا جائے گا تاکہ ملک کی سلامتی اور استحکام کو یقینی بنایا جا سکے۔ پشاور کور ہیڈ کوارٹرز پہنچنے پر چیف آف آرمی اسٹاف اور چیف آف ڈیفنس فورسز کا استقبال کمانڈر پشاور کور نے کیا۔