اسلام آباد، 15 ستمبر 2026 (نوشین): سعودی ولی عہد اور وزیراعظم محمد بن سلمان نے جدہ میں امریکی سینٹرل کمانڈ (سینٹ کام) کے سربراہ ایڈمرل بریڈ کوپر سے ملاقات کی، سعودی سرکاری میڈیا کے مطابق ملاقات کے دوران دونوں رہنماؤں نے خطے کی تازہ ترین صورتحال پر تبادلہ خیال کیا، تاہم سعودی اور امریکی حکام نے بات چیت کی مزید تفصیلات فراہم نہیں کیں۔ یہ ملاقات ایسے وقت میں ہوئی ہے جب یمن کے ایران نواز حوثی گروپ کی فوجی سرگرمیوں اور سعودی عرب کو نشانہ بنانے والے مبینہ حملوں میں اضافے کے باعث خطے میں کشیدگی بڑھ رہی ہے۔ رپورٹس کے مطابق حوثی جنگجوؤں نے حالیہ عرصے میں یمن کے بحیرۂ احمر کے ساحل کے ساتھ اپنی موجودگی میں توسیع کرتے ہوئے اہم علاقوں میں پیش قدمی کی ہے۔ اہم ساحلی شہر المخا پر مبینہ قبضے کے بعد گروپ نے باب المندب آبنائے کے قریب واقع تزویراتی اہمیت کے حامل جزیروں تک بھی اپنی رسائی بڑھا لی ہے، جس سے اسے بحیرۂ احمر کی اہم تجارتی گزرگاہ پر مزید تزویراتی اثر و رسوخ حاصل ہوسکتا ہے۔ باب المندب آبنائے بحیرۂ احمر کو خلیج عدن سے ملاتی ہے اور عالمی تجارت کے لیے انتہائی اہم سمندری راستہ ہے، جہاں سے بحری جہاز بحر ہند سے بحیرۂ احمر کے راستے نہر سویز کی جانب سفر کرتے ہیں۔