Saturday, November 21

سعودی عرب کا ریاض کی جانب داغے گئے حوثی باغیوں کے تین بیلسٹک میزائل تباہ کرنے کا دعویٰ

Saudi Arabia Intercepts Three Houthi Ballistic Missiles Targeting Riyadh

ریاض، 21 نومبر 2026 (نوشین): سعودی قیادت میں قائم اتحاد نے ہفتے کے روز دعویٰ کیا ہے کہ اس نے یمن کے ایران نواز حوثی باغیوں کی جانب سے دارالحکومت ریاض کی طرف داغے گئے تین بیلسٹک میزائلوں کو فضا میں ہی روک کر تباہ کر دیا، چند روز کے دوران سعودی دارالحکومت پر یہ دوسرا حملہ ہے، اس سے قبل جمعرات کو حوثی حملے میں شہر کی بلند ترین عمارت کو نقصان پہنچا تھا۔ خبر رساں ادارے رائٹرز کے ایک عینی شاہد کے مطابق ریاض کی فضا میں ایک میزائل نما شے تیزی سے گزرتی دکھائی دی جس کے پیچھے دھوئیں کی لکیر تھی، جس کے کچھ دیر بعد زور دار دھماکے کی آواز سنی گئی۔ تازہ حملہ جمعے کو سرحد پار کشیدگی میں اضافے کے بعد کیا گیا، جب سعودی قیادت میں قائم اتحاد نے بحیرہ احمر کی بندرگاہ حدیدہ پر حملے کیے اور صنعا میں حوثیوں کی میزائل اور ڈرون صلاحیتوں کو نشانہ بنایا۔ اس کے جواب میں حوثی باغیوں نے سعودی عرب کی بحیرہ احمر کی بندرگاہوں کو نشانہ بنانے کی دھمکی دی، فضائی کمپنیوں کو سعودی فضائی حدود استعمال نہ کرنے کا انتباہ جاری کیا اور جنوبی سعودی عرب میں ایک بجلی گھر اور بندرگاہ پر حملوں کا دعویٰ کیا۔ خطے میں بڑھتی ہوئی کشیدگی نے مزید عدم استحکام کے خدشات پیدا کر دیے ہیں، جبکہ یہ پیش رفت ایران کے خلاف امریکی قیادت میں جاری جنگ کے تناظر میں سامنے آئی ہے۔ جمعرات کو حوثی حملے میں پبلک انویسٹمنٹ فنڈ ٹاور کو نقصان پہنچا تھا، جہاں سعودی عرب کے خودمختار دولت فنڈ کا صدر دفتر قائم ہے اور یہ ریاض کی بلند ترین عمارت ہے۔ سعودی عرب ایک دہائی سے زائد عرصے سے یمن کی بین الاقوامی طور پر تسلیم شدہ حکومت کی حمایت کر رہا ہے، جبکہ 2022 میں تعطل کا شکار ہونے والی جنگ میں جولائی کے دوران دوبارہ شدت آئی۔ دوسری جانب یمنی فوج نے جمعے کے روز دعویٰ کیا کہ اس کے آپریشن ’فجرِ یمن‘ کے تحت مختلف محاذوں پر کی گئی 854 فوجی کارروائیوں کے دوران 193 حوثی کمانڈروں اور جنگجوؤں کو ہلاک یا زخمی کیا گیا، جبکہ 81 فوجی گاڑیوں اور دیگر عسکری سازوسامان کو تباہ یا نقصان پہنچایا گیا۔ فوج کے ترجمان ماجد النزیلی نے امریکی سوشل میڈیا پلیٹ فارم ایکس پر جاری بیان میں کہا کہ سرکاری فورسز نے عوامی مزاحمتی دستوں کی معاونت سے مختلف محاذوں پر کارروائیاں کیں۔ ان کے مطابق ان کارروائیوں میں 31 فضائی حملے، 687 توپ خانے کے حملے، 91 ڈرون حملے اور راکٹ لانچروں کے ذریعے 45 حملے شامل تھے۔ انہوں نے کہا کہ حوثیوں کے ٹھکانوں، اجتماعات اور دفاعی پوزیشنوں کو نشانہ بنایا گیا، جس کے نتیجے میں 193 فیلڈ کمانڈروں اور جنگجوؤں کو ہلاک یا زخمی کرکے غیر مؤثر بنایا گیا۔