
اسلام آباد، 21 نومبر 2026 (غفران): وزیراعظم شہباز شریف نے ریاض کے کنگ عبداللہ فنانشل ڈسٹرکٹ پر حوثی ملیشیا کے حملے کی شدید مذمت کرتے ہوئے سعودی عرب کے ساتھ پاکستان کی غیر متزلزل یکجہتی کا اظہار کیا ہے۔ وزیراعظم نے کہا کہ شہری بنیادی ڈھانچے اور معاشی تنصیبات کو نشانہ بنانا کسی صورت قابلِ قبول نہیں، جارحیت کے ایسے اقدامات علاقائی امن و استحکام کے لیے سنگین خطرہ ہیں۔ انہوں نے واضح کیا کہ پاکستان اپنے برادر ملک سعودی عرب اور اس کے عوام کے ساتھ مضبوطی سے کھڑا ہے اور سعودی عرب کی خودمختاری اور علاقائی سالمیت کے دفاع کے حق کی مکمل حمایت کرتا ہے۔ شہباز شریف کا کہنا تھا کہ سعودی عرب کو اپنے شہریوں اور اپنی سرزمین پر مقیم تمام افراد کے تحفظ کا پورا حق حاصل ہے۔ وزیراعظم نے اس عزم کا اعادہ کیا کہ پاکستان خطے میں پائیدار امن و استحکام کے قیام کے لیے کی جانے والی تمام کوششوں کی حمایت جاری رکھے گا۔