سیئول، 29 اکتوبر 2026 (نوشین): جنوبی کوریا کے قومی سلامتی کے مشیر وائی سنگ لک نے کہا ہے کہ سیئول آبنائے ہرمز میں ممکنہ تعیناتی کے مختلف آپشنز پر غور کر رہا ہے، جن میں میری ٹائم پٹرول طیارے کی تعیناتی بھی شامل ہے۔ جمعرات کو پارلیمانی آڈٹ کے دوران انہوں نے بتایا کہ جنوبی کوریا ممکنہ آپشنز کے حوالے سے واشنگٹن کے ساتھ بات چیت جاری رکھے ہوئے ہے، تاہم صدر لی جے میونگ کے سابقہ اعلان کے مطابق جنگی مقاصد کے لیے فوجی تعیناتی کو خارج از امکان قرار دیا گیا ہے۔ دوسری جانب پینٹاگون کے اعداد و شمار کے مطابق ایران کے خلاف جنگ پر امریکی فوج کے اخراجات اب تک 47 ارب ڈالر سے تجاوز کر چکے ہیں، جو جولائی میں امریکی محکمہ دفاع کے تخمینے سے 25 فیصد سے بھی زیادہ ہیں۔ خبر رساں ادارے رائٹرز کی جانب سے حاصل کردہ ان اعداد و شمار پر تبصرے کے لیے پینٹاگون نے فوری طور پر جواب نہیں دیا، جبکہ اخراجات کا نیا تخمینہ بھی عوامی سطح پر جاری نہیں کیا گیا۔ جنگی اخراجات میں اضافے کی تفصیلات ایسے وقت سامنے آئی ہیں جب ریپبلکن جماعت کو غیر مقبول جنگ کے سیاسی اثرات کا سامنا ہے اور 3 نومبر کو ہونے والے انتخابات قریب ہیں، جن کے نتائج آئندہ دو سال کے لیے امریکی کانگریس پر کنٹرول کا فیصلہ کریں گے۔