تہران، 21 ستمبر 2026 (نوشین): ایرانی آرمی کمانڈر ان چیف میجر جنرل امیر حاتمی نے ملک کی فوجی تیاری کا اعادہ کرتے ہوئے کہا ہے کہ ایرانی مسلح افواج ملک کی آزادی اور علاقائی سالمیت کے دفاع میں ایک لمحے کی بھی ہچکچاہٹ کا مظاہرہ نہیں کریں گی۔ ایک بیان میں امیر حاتمی نے کہا کہ ایرانی مسلح افواج اور عوام نے مخالفین کی جانب سے لاحق خطرات کے مقابلے میں استقامت اور مزاحمت کا مظاہرہ کیا ہے۔ انہوں نے خبردار کیا کہ ایران کی سلامتی، خودمختاری یا علاقائی سالمیت پر کسی بھی حملے کا فیصلہ کن جواب دیا جائے گا۔ ایرانی آرمی چیف نے کہا کہ حالیہ تنازعات کے دوران ایرانی قوم جارحیت اور دشمنانہ اقدامات کے خلاف متحد رہی، جبکہ مسلح افواج نے ملک کی خودمختاری اور علاقائی سالمیت کے تحفظ کے لیے اپنے ایمان، تجربے اور صلاحیتوں پر انحصار کیا۔ امیر حاتمی نے کہا کہ ایرانی مسلح افواج فضائی حدود، زمینی اور بحری سرحدوں سمیت تمام شعبوں میں ملک کے دفاع کے لیے مکمل طور پر تیار ہیں۔ انہوں نے کہا کہ فوج ایران کی آزادی اور قومی مفادات کے تحفظ کے ساتھ ساتھ کسی بھی خطرے کا جواب دینے کے لیے اپنی تیاری برقرار رکھے گی۔ ان کے یہ بیانات ایسے وقت میں سامنے آئے ہیں جب خطے میں کشیدگی میں اضافہ اور ایران کی سیکیورٹی صورتحال کے حوالے سے خدشات برقرار ہیں۔