اسلام آباد، 9 نومبر 2026 (نوشین): اقتصادی تعاون تنظیم (ای سی او) کے وزرائے خارجہ کا دو روزہ اجلاس 15 نومبر سے شروع ہونے جا رہا ہے، جس میں خطے کی بدلتی ہوئی صورتحال، علاقائی سلامتی اور جغرافیائی سیاسی کشیدگی کو خصوصی اہمیت دیے جانے کا امکان ہے۔ ایرانی وزیر خارجہ عباس عراقچی کی ممکنہ شرکت سے اجلاس کو عالمی سطح پر خاص توجہ حاصل ہونے کی توقع ہے، جبکہ شرکاء کے درمیان ایران اور امریکا کے درمیان کشیدگی، توانائی کی ترسیل کے تحفظ اور خلیجی خطے میں عدم استحکام کے اثرات پر تبادلہ خیال متوقع ہے۔ ذرائع کے مطابق ایرانی وزیر خارجہ کی وزیراعظم شہباز شریف اور پاکستان کے نائب وزیراعظم و وزیر خارجہ اسحاق ڈار سے دوطرفہ ملاقاتیں بھی متوقع ہیں۔ خطے میں بڑھتی ہوئی کشیدگی کے باعث پاکستان میں تنظیم کی مجوزہ سرگرمیاں پہلے ہی متاثر ہوچکی ہیں اور اکتوبر میں ای سی او کے وزرائے داخلہ کا اجلاس بھی ملتوی کرنا پڑا تھا۔ اگرچہ وزرائے خارجہ کے اجلاس کا بنیادی ایجنڈا اقتصادی تعاون، تجارت اور علاقائی روابط کا فروغ ہے، تاہم توقع ہے کہ شرکاء کی توجہ کا بڑا حصہ خطے کی موجودہ سکیورٹی صورتحال پر مرکوز رہے گا۔ اجلاس میں رکن ملک کی حیثیت سے افغانستان کی ممکنہ شرکت بھی علاقائی استحکام اور سلامتی سے متعلق معاملات کو مزید اہم بنا سکتی ہے۔