اسلام آباد، 20 ستمبر 2026 (غفران): نائب وزیراعظم و وزیر خارجہ سینیٹر محمد اسحاق ڈار 81ویں اقوام متحدہ جنرل اسمبلی کے اعلیٰ سطحی اجلاس میں شرکت کے لیے اسلام آباد سے نیویارک روانہ ہوگئے، جہاں وہ 21 سے 25 ستمبر تک وزیراعظم شہباز شریف کے ہمراہ مختلف سفارتی سرگرمیوں میں شرکت کریں گے۔ دفتر خارجہ کے مطابق اسحاق ڈار کا اعلیٰ سطحی ہفتے کے دوران وسیع سفارتی پروگرام ہوگا، جس میں جموں و کشمیر سے متعلق اسلامی تعاون تنظیم (او آئی سی) کے رابطہ گروپ کے اجلاس میں شرکت بھی شامل ہے، جہاں پاکستان کشمیری عوام کے حقوق کی حمایت کا اعادہ کرے گا۔ وہ اقوام متحدہ جنرل اسمبلی کے موقع پر او آئی سی کے متعدد وزارتی اجلاسوں میں بھی شرکت کریں گے، جن میں او آئی سی وزرائے خارجہ کا سالانہ رابطہ اجلاس اور رابطہ گروپ کے دیگر اجلاس شامل ہیں۔ اسحاق ڈار فلسطین کے حوالے سے اعلیٰ سطحی اجلاسوں میں بھی شرکت کریں گے، جن میں آٹھ عرب و اسلامی ممالک کے گروپ کا اجلاس اور دو ریاستی حل کے نفاذ کے لیے عالمی اتحاد کا اعلیٰ سطحی وزارتی اجلاس شامل ہے۔ نائب وزیراعظم و وزیر خارجہ مصنوعی ذہانت سے متعلق اقوام متحدہ سلامتی کونسل کی اعلیٰ سطحی بریفنگ سے بھی خطاب کریں گے اور وبائی امراض کی روک تھام، تیاری اور ردعمل سے متعلق اعلیٰ سطحی اجلاس میں شرکت کریں گے۔ اسحاق ڈار اقتصادی تعاون تنظیم کے وزرائے کونسل کے اجلاس کی صدارت بھی کریں گے اور مختلف ممالک کے وزرائے خارجہ سے دوطرفہ ملاقاتیں کریں گے۔ دفتر خارجہ کے مطابق وہ وزیراعظم شہباز شریف کے ہمراہ اعلیٰ سطحی دوطرفہ ملاقاتوں اور دیگر سفارتی سرگرمیوں میں بھی شریک ہوں گے، جن کے دوران پاکستان کی علاقائی اور عالمی امن و استحکام کے لیے جاری کوششوں کو اجاگر کرنے کے ساتھ اہم علاقائی اور بین الاقوامی امور پر تبادلہ خیال کیا جائے گا۔