یروشلم، 30 ستمبر 2026 (کامران راجہ): متحدہ عرب امارات سے اسرائیل جانے والی فلائی دبئی کی پرواز پائلٹوں کے درمیان مبینہ جسمانی جھگڑے کے بعد ہنگامی سگنل بھیجے جانے پر سعودی عرب کی جانب موڑ دی گئی۔ اسرائیلی حکام کے مطابق فلائی دبئی کی پرواز ایف زیڈ 1073 دبئی سے تل ابیب جارہی تھی اور اردن کی فضائی حدود سے گزر رہی تھی کہ طیارے نے پہلے عمومی ہنگامی سگنل بھیجا، جس کے چند منٹ بعد ممکنہ غیر قانونی مداخلت کی نشاندہی کرنے والا ایک اور ہنگامی سگنل بھیجا گیا۔ پرواز نے بعد ازاں دوبارہ عمومی ہنگامی سگنل بھیجا اور شمال مغربی سعودی عرب کے شہر تبوک کے ہوائی اڈے پر بحفاظت لینڈنگ کی۔ اسرائیلی وزیراعظم کے دفتر کے ترجمان نے کہا کہ واقعے کو ہائی جیکنگ کا واقعہ نہیں سمجھا جارہا۔ فلائی دبئی کے ترجمان نے بتایا کہ تل ابیب جاتے ہوئے پرواز کو ایک واقعے کا سامنا کرنا پڑا جس کے باعث اسے تبوک کی جانب موڑ دیا گیا، جہاں طیارہ بحفاظت اترا اور تمام مسافر محفوظ رہے۔ ایک اسرائیلی عہدیدار نے نام ظاہر نہ کرنے کی شرط پر رائٹرز کو بتایا کہ پائلٹوں کے درمیان جسمانی جھگڑے کے بعد ہنگامی سگنل بھیجے گئے تھے۔ تاہم یہ فوری طور پر واضح نہیں ہوسکا کہ آیا کسی پائلٹ نے جان بوجھ کر ہنگامی سگنل فعال کیا تھا۔ ایک مسافر کی والدہ نے بھی بتایا کہ ان کی بیٹی نے طیارے میں چیخ و پکار اور مبینہ تشدد کی آوازیں سنی تھیں، تاہم اس بیان کی آزادانہ طور پر تصدیق نہیں ہوسکی۔ اسرائیلی وزیراعظم بنیامین نیتن یاہو نے واقعے کے حوالے سے مشاورت کی، جبکہ ان کے دفتر نے صورتحال کو قابو میں قرار دیتے ہوئے کہا کہ اسرائیلی مسافروں کو وطن واپس لانے کے لیے کوششیں جاری ہیں۔ فلائی دبئی دبئی اور تل ابیب کے درمیان روزانہ پروازیں چلاتی ہے اور یہ راستہ اسرائیلی مسافروں میں مقبول ہے۔