اسلام آباد، 29 اکتوبر 2026 (کامران راجہ): وزیراعظم شہباز شریف نے لاہور اور کراچی کے ایئرپورٹس کی توسیع کے منصوبوں کی منظوری دیتے ہوئے متعلقہ حکام کو ہدایت کی ہے کہ ہوائی اڈوں کی سہولیات کو بین الاقوامی معیار کے مطابق بہتر بنایا جائے اور مسافروں کو معیاری خدمات فراہم کی جائیں۔ وزیراعظم نے اسلام آباد میں ایئرپورٹس کی توسیع اور مسافروں کو سہولیات فراہم کرنے کے اقدامات کا جائزہ لینے کے لیے اجلاس کی صدارت کرتے ہوئے ہدایت کی کہ تعمیراتی معیار پر سمجھوتہ کیے بغیر منصوبے مقررہ مدت میں مکمل کیے جائیں۔ انہوں نے توسیعی منصوبوں اور مسافروں کی سہولیات میں بہتری کے لیے متعارف کرائی گئی اصلاحات کی تھرڈ پارٹی سے توثیق کرانے اور خدمات کا معیار بہتر بنانے کے لیے عالمی شہرت یافتہ اداروں کی خدمات حاصل کرنے کی بھی ہدایت کی۔ شہباز شریف نے ایئرپورٹس پر تعینات افسران اور عملے کو مسافروں کی معاونت کے لیے باقاعدہ معیاری تربیت فراہم کرنے، مختلف اداروں کے درمیان بہتر رابطہ کاری اور معیاری خوراک کی فراہمی یقینی بنانے کے لیے معتبر کیٹرنگ کمپنیوں کی خدمات حاصل کرنے پر زور دیا۔ اجلاس کو ایک بین الاقوامی ادارے کی جانب سے بڑے ہوائی اڈوں پر مسافروں کو فراہم کی جانے والی سہولیات کے معیار سے متعلق سروے، لاہور اور کراچی ایئرپورٹس کے ماسٹر پلانز اور جاری ترقیاتی منصوبوں پر بریفنگ دی گئی۔ حکام نے بتایا کہ کراچی کے جناح انٹرنیشنل ایئرپورٹ پر رن وے کی توسیع کا کام مکمل کر لیا گیا ہے۔ وزیراعظم نے ہدایت کی کہ لاہور اور کراچی ایئرپورٹس کی توسیع کے منصوبے بین الاقوامی معیار اور منظور شدہ شیڈول کے مطابق مکمل کیے جائیں۔ اجلاس کو بتایا گیا کہ سول ایوی ایشن اتھارٹی نے گزشتہ ایک سال کے دوران 14 ایئرپورٹس کو ملکی پروازوں کے لیے فعال بنایا، جبکہ وفاقی تحقیقاتی ادارے (ایف آئی اے) نے مسافروں کی سہولت کے لیے عملے کی تعداد اور کاؤنٹرز میں اضافہ کیا ہے۔ حکام کے مطابق بڑے ایئرپورٹس پر خودکار بارڈر مینجمنٹ نظام، جسے ای گیٹس کہا جاتا ہے، نصب کرنے کا کام تیزی سے جاری ہے۔ کراچی کو فضائی کارگو کا مرکز بنانے کے لیے ایئر کارگو ولیج کی تیاری پر بھی کام ہو رہا ہے۔ اجلاس کو بتایا گیا کہ اسلام آباد انٹرنیشنل ایئرپورٹ پر مسافروں کی سہولت کے لیے میٹ اینڈ گریٹ سروس متعارف کرائی گئی ہے، جبکہ ایف آئی اے نے مسافروں کی بروقت رہنمائی کے لیے بڑے ایئرپورٹس پر پری ڈیپارچر ڈیسک بھی قائم کیے ہیں۔ اجلاس کو مزید بتایا گیا کہ حیدرآباد میں موجود ایک فضائی ادارے کو بین الاقوامی معیار کی ایوی ایشن یونیورسٹی میں اپ گریڈ کیا جا رہا ہے، جس پر کام فروری 2028 تک شروع ہونے کا منصوبہ ہے۔ اجلاس میں نائب وزیراعظم و وزیر خارجہ سینیٹر محمد اسحاق ڈار، وزیر دفاع خواجہ محمد آصف، وفاقی وزیر ڈاکٹر مصدق ملک، احسن خان چیمہ، وزیر اطلاعات عطااللہ تارڑ، وزیراعظم کے مشیر محمد علی، ارکان قومی اسمبلی راجہ اسامہ سرور اور علی زاہد، وزیراعظم کے کوآرڈینیٹر سردار یاسر الیاس اور متعلقہ اعلیٰ حکام نے شرکت کی۔