اسلام آباد، 18 اکتوبر 2026 (نوشین): وزیراعظم شہباز شریف نے وفاقی دارالحکومت اسلام آباد میں دانش اسکول کا افتتاح کر دیا، جو ہونہار طلبہ کے لیے تعلیمی مواقع بڑھانے کی جانب ایک اہم قدم ہے۔ افتتاحی تقریب کے دوران وزیراعظم کو دانش اسکول اسلام آباد کی سہولیات اور تعلیمی انتظامات کے حوالے سے بریفنگ دی گئی۔ حکام نے بتایا کہ اسکول 30 ایکڑ رقبے پر تعمیر کیا گیا ہے، جہاں ابتدائی طور پر چھٹی، ساتویں اور آٹھویں جماعت کی کلاسز شروع کی گئی ہیں۔ ہر جماعت میں 120 طلبہ و طالبات تعلیم حاصل کر رہے ہیں۔ بریفنگ میں مزید بتایا گیا کہ مختلف علاقوں سے 360 ہونہار طلبہ و طالبات کو سو فیصد میرٹ کی بنیاد پر داخلہ دیا گیا ہے۔ فی الحال اسکول میں 38 اساتذہ بھرتی کیے گئے ہیں، جبکہ ضروریات کے مطابق تدریسی عملے میں مزید اضافہ کیا جائے گا۔ اسکول میں لڑکوں اور لڑکیوں کے لیے الگ الگ تعلیمی بلاکس قائم کیے گئے ہیں، جن میں سے ہر بلاک میں 24 کلاس رومز موجود ہیں۔ اسکول میں انفارمیشن ٹیکنالوجی، سائنس اور روبوٹکس کی تجربہ گاہوں کے علاوہ ای لائبریری اور آرٹ روم بھی قائم کیے گئے ہیں۔ اس منصوبے کا مقصد مستحق اور ہونہار طلبہ کو معیاری تعلیم اور جدید تعلیمی سہولیات فراہم کرنا ہے تاکہ وہ اپنی صلاحیتوں کو بہتر بنا سکیں اور مستقبل میں ترقی کے مواقع حاصل کر سکیں۔