لاہور، 31 اکتوبر 2026 (غفران): وزیراعلیٰ پنجاب مریم نواز شریف سے پاکستان میں تعینات فرانس کے نئے سفیر ژاں نوئل پواریے نے ملاقات کی، جس میں پاکستان اور فرانس کے درمیان تجارت، سرمایہ کاری، صنعت اور اقتصادی تعاون کو فروغ دینے کے مختلف امکانات پر تبادلہ خیال کیا گیا۔ ملاقات میں پنجاب اور فرانس کے درمیان تجارتی تعلقات کے فروغ، سرمایہ کاری میں اضافے اور صنعتی شراکت داری کے نئے مواقع تلاش کرنے پر اتفاق کیا گیا۔ مریم نواز نے فرانسیسی سفیر کا لاہور آمد پر خیرمقدم کیا اور انہیں سفارتی ذمہ داریاں سنبھالنے پر مبارکباد دی۔ فرانسیسی سفیر نے دوطرفہ تجارتی تعلقات کے فروغ کے لیے وزیراعلیٰ پنجاب کو فرانس کے دورے کی دعوت دی، جسے انہوں نے سراہا۔ وزیراعلیٰ نے فرانسیسی سرمایہ کاروں کو پی آئی وی او ٹی اقدام کے تحت پنجاب کے زرعی، صنعتی اور لائیوسٹاک کے شعبوں میں سرمایہ کاری کی دعوت دیتے ہوئے کہا کہ صوبائی سطح پر براہ راست روابط صنعتی تعاون اور ترقیاتی شراکت داری کے نئے راستے کھول سکتے ہیں۔ ملاقات میں جنرلائزڈ اسکیم آف پریفرنسز پلس (جی ایس پی پلس) اور یورپی منڈیوں میں پاکستانی برآمدات بڑھانے کے امکانات پر بھی تفصیلی گفتگو ہوئی۔ مریم نواز نے جی ایس پی پلس کو پاکستان کی برآمدات اور پنجاب کی صنعتی معیشت کے لیے انتہائی اہم قرار دیتے ہوئے کہا کہ یورپی منڈیوں تک ترجیحی رسائی ملکی برآمدات میں اضافے کے لیے ناگزیر ہے۔ انہوں نے کہا کہ پنجاب کی ٹیکسٹائل، گارمنٹس، کھیلوں کے سامان اور چمڑے کی صنعتوں کے لیے یورپی منڈیوں تک ترجیحی رسائی خصوصی اہمیت رکھتی ہے، جبکہ نئے جی ایس پی پلس فریم ورک کے تقاضوں سے ہم آہنگ ہونا بھی ضروری ہے۔ وزیراعلیٰ نے پاکستان کا جی ایس پی پلس اسٹیٹس برقرار رکھنے کے لیے فرانس کے ساتھ مسلسل سفارتی روابط اور مؤثر مذاکرات کی ضرورت پر زور دیتے ہوئے کہا کہ فرانس ماضی میں وزارتی سطح پر پاکستان کے اسٹیٹس کی حمایت کر چکا ہے اور یورپی یونین میں پاکستان کے تجارتی مفادات کے تحفظ کے لیے اس کا تعاون اہم ہے۔

مریم نواز نے بتایا کہ مالی سال 2025-26 کے دوران یورپی یونین کے لیے پاکستان کی برآمدات تقریباً 8.96 ارب ڈالر تک پہنچ گئیں، جبکہ انہوں نے فرانس کے ساتھ تجارتی اور صنعتی تعاون مزید بڑھانے میں دلچسپی کا اظہار کیا۔ انہوں نے پنجاب میں این ٹی ڈی سی کی ٹرانسمیشن لائنوں اور گرڈ اسٹیشنز کے لیے 180 ملین یورو قرض فراہم کرنے پر فرانس کا شکریہ ادا کیا اور فرانسیسی سرمایہ کاروں کو صوبے کے بڑے شہروں میں مجوزہ اربن ویسٹ واٹر گورننس منصوبے میں شرکت کی دعوت بھی دی۔ دونوں فریقوں نے پاکستان اور فرانس کے دیرینہ دوستانہ تعلقات کو مزید مضبوط بنانے اور دوطرفہ تعاون کو طویل المدتی ادارہ جاتی بنیادوں پر استوار کرنے کے عزم کا اعادہ کیا۔ وزیراعلیٰ نے کہا کہ دونوں ممالک کے درمیان کئی دہائیوں پر محیط دوستی موجود ہے اور اقتصادی تعاون میں اضافے سے تعلقات کو نئی جہت مل سکتی ہے۔ انہوں نے فرانس کے 1789 کے اعلامیہ برائے حقوقِ انسان و شہری کو آزادی، مساوات اور انسانی وقار کے دیرپا اصولوں کا عکاس قرار دیا اور فلسطین کو تسلیم کرنے اور انصاف و مساوی حقوق کے حوالے سے فرانس کے مؤقف کا خیرمقدم کیا۔ مریم نواز نے کہا کہ فرانسیسی ڈیری، فوڈ پروسیسنگ اور کولڈ چین کمپنیاں پنجاب کے زرعی شعبے میں ویلیو ایڈیشن بڑھانے میں اہم کردار ادا کر سکتی ہیں۔ انہوں نے مزید کہا کہ فرانسیسی یوٹیلیٹی کمپنیاں پبلک پرائیویٹ پارٹنرشپ (پی پی پی) ماڈل کے تحت صوبائی حکومت کے ساتھ مل کر شہری علاقوں میں پانی کی فراہمی، گندے پانی کی صفائی اور ٹھوس فضلے کے انتظام کو بہتر بنا سکتی ہیں۔ فرانسیسی توانائی کمپنیاں صنعتی علاقوں میں شمسی توانائی، بجلی کے ترسیلی نظام اور توانائی کی بچت کے منصوبوں میں بھی سرمایہ کاری کر سکتی ہیں، جبکہ فرانسیسی ادارے پی آئی وی او ٹی اقدام کے تحت پنجاب کے صنعتی مراکز کے لیے افرادی قوت کی تربیت میں معاونت فراہم کر سکتے ہیں۔