ریکارڈ آمدنی کے باوجود مانچسٹر یونائیٹڈ کے خسارے میں اضافہ

مانچسٹر، 24 ستمبر 2026 (نوشین): مانچسٹر یونائیٹڈ کا سالانہ خالص خسارہ تقریباً ایک تہائی اضافے کے ساتھ 43 ملین پاؤنڈ (57 ملین ڈالر) تک پہنچ گیا ہے، حالانکہ کلب نے 30 جون کو ختم ہونے والے مالی سال کے دوران ریکارڈ آمدنی کی اطلاع دی ہے۔ کلب کی آمدنی 1.7 فیصد اضافے کے ساتھ 677.6 ملین پاؤنڈ رہی، تاہم ٹیکس کے بعد کلب کو مسلسل ساتویں سالانہ خسارے کا سامنا کرنا پڑا۔ مالی نتائج پر شریک مالک جم ریٹکلف کی جانب سے کیے گئے اخراجات میں کمی کے اقدامات، سابق مینیجر روبن اموریم کی رخصتی سے متعلق معاہداتی ادائیگیوں اور قرضوں کی واپسی میں نمایاں اضافے کے اثرات مرتب ہوئے۔ تازہ ترین مالی اعداد و شمار 2025-26 کے سیزن سے متعلق ہیں، جس کے دوران مانچسٹر یونائیٹڈ کے سابق کھلاڑی مائیکل کیرک نے روبن اموریم کی جگہ سنبھالی اور ٹیم کو یوئیفا چیمپئنز لیگ کے لیے کوالیفائی کرایا۔ آمدنی میں اضافے کی بڑی وجہ براڈکاسٹنگ آمدنی میں تقریباً 20 فیصد اضافہ تھا، جسے پریمیئر لیگ میں ٹیم کی تیسری پوزیشن نے تقویت دی، جبکہ گزشتہ سیزن میں یونائیٹڈ 15ویں نمبر پر رہا تھا۔ تاہم، ایسے سیزن کے دوران جب کلب نے کوئی یورپی مقابلہ نہیں کھیلا، تجارتی اور میچ ڈے آمدنی میں تقریباً پانچ پانچ فیصد کمی ریکارڈ کی گئی۔ کلب کے مالی حسابات کے مطابق 8.2 ملین پاؤنڈ کے غیر معمولی اخراجات بھی ہوئے، جن میں زیادہ تر اخراجات جنوری میں 14 ماہ بعد اموریم کی رخصتی سے متعلق تھے۔ مانچسٹر یونائیٹڈ نے اولڈ ٹریفورڈ کے قریب 63.5 ملین پاؤنڈ میں زمین بھی خریدی ہے، جہاں کلب 100,000 نشستوں کی گنجائش والا نیا اسٹیڈیم تعمیر کرنے کا منصوبہ رکھتا ہے۔ فروری 2024 میں کلب میں حصص حاصل کرنے کے بعد جم ریٹکلف نے بڑے پیمانے پر اخراجات میں کمی کے اقدامات کیے، جن میں ملازمتوں میں نمایاں کمی بھی شامل ہے۔ یونائیٹڈ کے چیف ایگزیکٹو عمر برادہ نے کہا کہ تازہ مالی اعداد و شمار کلب کی بنیادی مضبوطی اور تجارتی کشش کو ظاہر کرتے ہیں، جبکہ انہوں نے مالی معاملات میں نظم و ضبط برقرار رکھنے کے عزم کا بھی اظہار کیا۔ مانچسٹر یونائیٹڈ کو رواں مالی سال کے دوران 740 ملین سے 760 ملین پاؤنڈ تک آمدنی کی توقع ہے۔ تاہم میدان میں نئے سیزن کا آغاز ٹیم کے لیے مشکلات سے بھرپور رہا ہے اور موسم گرما میں متعدد نئے کھلاڑیوں کی شمولیت کے باوجود یونائیٹڈ نے پریمیئر لیگ کے ابتدائی پانچ میچوں میں صرف پانچ پوائنٹس حاصل کیے ہیں، جو کلب کی تاریخ میں لیگ سیزن کے بدترین آغاز کے ریکارڈ کے برابر ہے، جبکہ گزشتہ ہفتے ٹیم انگلش لیگ کپ سے بھی باہر ہوگئی۔