جوہانسبرگ، 27 ستمبر, 2026 (نوشین): پولیس کے مطابق جنوبی افریقہ کے بڑے شہروں میں فائرنگ کے دو الگ واقعات میں کم از کم 27 افراد ہلاک اور 26 زخمی ہوگئے۔ پہلے واقعے میں آٹھ مسلح افراد نے جوہانسبرگ کے مغرب میں واقع وڈیلا کے علاقے میں ایک بار پر دھاوا بول دیا اور باہر موجود افراد پر فائرنگ کے بعد اندر داخل ہوکر بھی فائرنگ جاری رکھی۔ واقعے میں 13 مردوں اور 4 خواتین سمیت 17 افراد ہلاک جبکہ 15 زخمی ہوگئے۔ پولیس کا کہنا ہے کہ فائرنگ کی وجہ تاحال معلوم نہیں ہوسکی، تاہم بظاہر یہ حملہ گزشتہ ماہ اسی شراب خانے میں پیش آنے والے ایک واقعے کے ردعمل میں کیا گیا، جس میں ایک شخص ہلاک اور دوسرا زخمی ہوا تھا۔ کیپ ٹاؤن کے باہر ایک ٹاؤن شپ میں اتوار کی صبح ایک تفریحی مقام پر فائرنگ کے دوسرے واقعے میں 10 افراد ہلاک اور 11 زخمی ہوگئے۔ پولیس کے مطابق پانچ افراد موقع پر دم توڑ گئے جبکہ دیگر زخمیوں نے اسپتال منتقل کیے جانے کے دوران دم توڑا۔ دونوں واقعات میں تاحال کسی مشتبہ شخص کو گرفتار نہیں کیا گیا۔ یہ حملے ایسے وقت میں ہوئے ہیں جب جنوبی افریقہ مسلسل مسلح تشدد کا سامنا کر رہا ہے، جس کا تعلق اکثر گروہی دشمنیوں اور غیر رسمی کاروباری سرگرمیوں کے درمیان مسابقت سے جوڑا جاتا ہے۔ حکام نے ملک کے مختلف پرتشدد علاقوں میں جرائم پر قابو پانے کے لیے پولیس کی معاونت کے لیے فوج بھی تعینات کی ہے۔