تائی پے، 17 اگست 2026 (غفران) – تائیوان کے صدر لائی چنگ تے نے کہا ہے کہ ملک اپنے دفاع کو مضبوط بنانے کے لیے پرعزم ہے اور آئندہ سال ریکارڈ دفاعی بجٹ مختص کرنے کا منصوبہ رکھتا ہے۔ انہوں نے حکومت کی جانب سے تجویز کردہ دفاعی بجٹ کو امن میں سرمایہ کاری قرار دیا۔ 2027 کے لیے مجموعی دفاعی بجٹ پہلی مرتبہ ایک ٹریلین تائیوان ڈالر سے تجاوز کرنے کا امکان ہے۔ صدر لائی کے مطابق 2027 میں تائیوان کا دفاعی بجٹ 1.1225 ٹریلین تائیوان ڈالر تک پہنچ جائے گا، جو مجموعی ملکی پیداوار (جی ڈی پی) کے 3 فیصد سے زیادہ بنتا ہے۔ انہوں نے کہا کہ یہ بجٹ تائیوان کی اپنی دفاعی صلاحیتوں کو مضبوط بنانے کے عزم کا واضح اظہار ہے۔ تائیوان کو چین کی جانب سے بڑھتے ہوئے فوجی اور سیاسی دباؤ کا سامنا ہے، جبکہ امریکا بھی تائیوان پر اپنے دفاع کے لیے زیادہ اخراجات کرنے پر زور دیتا رہا ہے۔ لائی چنگ تے نے کہا کہ دفاع پر سرمایہ کاری دراصل امن میں سرمایہ کاری ہے اور تائیوان آبنائے اور خطے میں امن و استحکام برقرار رکھنے کے لیے مزید مضبوط دفاعی قوت تشکیل دی جائے گی۔ تائیوان کی کابینہ آئندہ سال کے بجٹ کی تفصیلات جمعرات کو پیش کرے گی، جس میں دفاعی اخراجات کی مد میں مختص رقم اور اس کے استعمال کی تفصیلات بھی شامل ہوں گی۔