اسلام آباد، 10 اکتوبر 2026 (غفران): ایشین ہاکی چیمپئنز ٹرافی 2026 میں پاکستان کی جگہ بنگلہ دیش کی شرکت متوقع ہے، جس نے مبینہ طور پر ایشین ہاکی فیڈریشن کی دعوت قبول کرلی ہے۔ ذرائع کے مطابق پاکستان نے بھارت میں ٹورنامنٹ کھیلنے سے معذرت کی تھی، جس کے بعد بنگلہ دیش کو چھ ملکی ایونٹ میں شامل کرنے کا فیصلہ کیا گیا۔ ٹورنامنٹ 27 اکتوبر سے 5 نومبر تک بھارتی شہروں جالندھر اور موہالی میں کھیلا جائے گا۔ ایشین ہاکی فیڈریشن کی جانب سے بنگلہ دیش کی شرکت کا باضابطہ اعلان اور نظرثانی شدہ شیڈول جاری کیے جانے کا امکان ہے۔ پاکستان ہاکی فیڈریشن نے پاک بھارت موجودہ صورتِ حال کے پیش نظر ٹورنامنٹ کسی غیر جانب دار ملک منتقل کرنے یا پاکستان کے میچز غیر جانب دار مقام پر کرانے کی درخواست کی تھی، تاہم ہاکی انڈیا نے یہ تجویز مسترد کرتے ہوئے ایونٹ مقررہ شیڈول کے مطابق بھارت میں منعقد کرنے پر اصرار کیا۔ اس کے بعد پاکستان ہاکی فیڈریشن نے ایشین ہاکی فیڈریشن کو آگاہ کیا کہ موجودہ حالات میں قومی ٹیم کو بھارت بھیجنا ممکن نہیں۔ بنگلہ دیش کی شمولیت سے پاکستان کی اس براعظمی ایونٹ میں شرکت کا امکان ختم ہوگیا ہے، جبکہ بنگلہ دیش کو ایشیا کی نمایاں ہاکی ٹیموں کے خلاف کھیلنے کا موقع ملے گا۔ بھارت ٹورنامنٹ میں دفاعی چیمپئن کی حیثیت سے شرکت کرے گا، جس نے 2023 میں چنئی اور 2024 میں چین کے شہر ہولونبئیر میں ٹائٹل اپنے نام کیا تھا۔