اسلام آباد، 14 نومبر 2026 (غفران): پاکستان انڈر 19 ایشیا کپ کا ٹائٹل جیتنے سے محروم ہوگیا، فائنل میں بھارت نے سنسنی خیز مقابلے کے بعد پاکستان کو ایک وکٹ سے شکست دے کر چیمپئن شپ اپنے نام کر لی۔ عمان کے ال عامرات کرکٹ گراؤنڈ میں کھیلے گئے فائنل میں 338 رنز کے ہدف کے تعاقب میں بھارتی ٹیم ایک موقع پر 252 رنز پر 8 وکٹیں گنوا چکی تھی اور پاکستان کی فتح یقینی دکھائی دے رہی تھی، تاہم موہت الویٰ اور منال چوہان نے آخری اوورز میں شاندار بیٹنگ کرتے ہوئے میچ کا پانسہ پلٹ دیا۔ موہت الویٰ 26 گیندوں پر 49 رنز بنا کر ناٹ آؤٹ رہے، جس میں پانچ چوکے اور تین چھکے شامل تھے، جبکہ منال چوہان نے 32 گیندوں پر 47 رنز کی برق رفتار اننگز کھیلی، جس میں تین چھکے اور تین چوکے شامل تھے۔ بھارت کو آخری اوور میں کامیابی کے لیے 8 رنز درکار تھے اور آخری گیند پر تین رنز کا ہدف باقی تھا، جس پر موہت نے شاندار چوکا لگا کر بھارت کو ایک وکٹ سے فتح دلا دی۔ اس سے قبل پاکستان نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 337 رنز بنائے۔ عثمان خان نے 111 گیندوں پر 107 رنز کی شاندار اننگز کھیلی، جو ٹورنامنٹ میں ان کی دوسری سنچری تھی، جبکہ عبدالقادر نے صرف 54 گیندوں پر 80 رنز بنائے، جس میں آٹھ چھکے اور تین چوکے شامل تھے۔ دونوں بلے بازوں نے دوسری وکٹ کے لیے 135 رنز کی اہم شراکت قائم کی۔ کپتان فرحان یوسف نے بھی 60 گیندوں پر 63 رنز بنائے، جبکہ اوپنر حیان خان نے 21 رنز کا حصہ ڈالا۔ بھارت کی جانب سے کاویا پریش پٹیل نے 68 رنز دے کر چار وکٹیں حاصل کیں، جبکہ چگوروپتی وینکٹا نے 40 رنز کے عوض تین کھلاڑیوں کو آؤٹ کیا۔ ہدف کے تعاقب میں بھارتی اوپنرز لکشیا رائے چندانی اور آریا ویر سہواگ نے 95 رنز کی شراکت قائم کرکے ٹیم کو اچھا آغاز فراہم کیا۔ آریا ویر نے 58 جبکہ لکشیا نے 101 گیندوں پر 80 رنز بنائے۔ پاکستان کی جانب سے رضوان اللہ نے 53 رنز دے کر تین وکٹیں حاصل کیں، نقاب شفیق نے دو کھلاڑیوں کو آؤٹ کیا، جبکہ علی رضا، حسنین عباس ڈار اور محمد سمیع نے بھی اہم وکٹیں حاصل کیں۔ پاکستانی بولرز نے بھارتی ٹیم کو مشکلات سے دوچار کیا، تاہم آخری لمحات میں موہت اور منال کی شاندار بیٹنگ نے پاکستان سے فتح چھین لی۔