اسلام آباد، 29 اکتوبر 2026 (غفران): وزارت اطلاعات و نشریات نے پاک افغان سرحد پر فائرنگ کے واقعے سے متعلق افغان طالبان کے دعوے کو جھوٹا، من گھڑت اور گمراہ کن قرار دیتے ہوئے مسترد کر دیا ہے۔ وزارت کے فیکٹ چیک کے مطابق انگور اڈہ سرحدی واقعے کے بارے میں غلط بیانیہ تشکیل دینے کی افغان طالبان کی تازہ کوشش ان کے گمراہ کن طرزِ عمل کی عکاسی کرتی ہے۔ وزارت نے کہا کہ افغان طالبان فورسز نے بلااشتعال فائرنگ کی اور پاکستانی علاقے میں غیر مسلح شہریوں پر مارٹر گولے داغے۔ بیان کے مطابق یہ واقعہ بھارت اور اس کے پراکسی عناصر سے منسلک وسیع تر سلسلے کا حصہ تھا۔ وزارت اطلاعات کے مطابق پاکستانی سیکیورٹی فورسز نے فوری اور مؤثر جواب دیتے ہوئے افغان طالبان کی سات چوکیاں تباہ کر دیں، جبکہ کارروائی میں طالبان فورسز کو بھاری جانی و مادی نقصان پہنچا۔ وزارت نے طالبان حکومت کے ترجمانوں کے بیانات کو بھی مسترد کرتے ہوئے کہا کہ یہ زمینی حقائق کی عکاسی نہیں کرتے۔ وزارت کے مطابق طالبان حکام گمراہ کن دعوؤں کے ذریعے اپنی ہی آبادی کو دھوکہ دینے کی کوشش کر رہے ہیں۔ وزارت اطلاعات و نشریات نے واقعے سے متعلق افغان طالبان کے مؤقف کو مسترد کرتے ہوئے کہا کہ اس کا بیان سرکاری فیکٹ چیک میں پیش کیے گئے حقائق پر مبنی ہے۔