بیجنگ، 14 نومبر 2026 (نوشین): چین اور امریکہ نے دونوں ممالک کے صدور شی جن پنگ اور ڈونلڈ ٹرمپ کی آئندہ ہفتے متوقع ملاقات سے قبل تجارتی محصولات میں کمی، زرعی تجارت اور دیگر معاشی امور پر تبادلہ خیال کیا ہے۔ چین کی وزارت تجارت کے مطابق دونوں ممالک کے درمیان تجارتی کونسل کا پہلا اجلاس ہوا، جس میں سابقہ تجارتی وعدوں پر عمل درآمد کے حوالے سے تفصیلی اور تعمیری بات چیت کی گئی۔ مذاکرات میں 60 ارب ڈالر کے مجوزہ تجارتی پیکج پر بھی غور کیا گیا، جس کے تحت دونوں ممالک ایک دوسرے کی مصنوعات پر درآمدی محصولات میں کمی کی تجویز پر کام کر رہے ہیں۔ ستمبر میں دونوں رہنماؤں کی ملاقات کے بعد زیرِ بحث آنے والے اس پیکج میں تقریباً 17 ارب ڈالر مالیت کی امریکی زرعی مصنوعات بھی شامل ہیں، جو چین نے 2024 میں درآمد کی تھیں، تاہم اس معاہدے کو تاحال حتمی شکل نہیں دی جا سکی۔ چینی وزارت تجارت نے کسی نئے معاہدے کا اعلان نہیں کیا اور کہا کہ دونوں ممالک تجارتی تنازعات حل کرنے، تعاون بڑھانے اور زیرِ التوا معاملات پر بات چیت کے لیے کونسل کا فورم استعمال کرتے رہیں گے۔ بیجنگ نے واشنگٹن پر زور دیا ہے کہ وہ محصولات میں کمی کے انتظام پر عمل درآمد کرے، کیونکہ اسے امریکی زرعی مصنوعات کی خریداری بڑھانے کے لیے اہم قرار دیا جا رہا ہے۔ تاہم سویابین کے علاوہ دیگر امریکی زرعی مصنوعات کی چین کو درآمد گزشتہ سات برس کی کم ترین سطح پر آنے کا امکان ہے، حالانکہ چین نے 2028 تک ہر سال 17 ارب ڈالر مالیت کی امریکی زرعی مصنوعات خریدنے کا وعدہ کر رکھا ہے۔ وائٹ ہاؤس کے مطابق صدر ڈونلڈ ٹرمپ جمعرات کو شینزن میں ایشیا پیسیفک اقتصادی تعاون (اے پی ای سی) فورم کے موقع پر چینی صدر شی جن پنگ سے ملاقات کریں گے۔