انطالیہ، 12 نومبر 2026 (غفران): وزیراعظم محمد شہباز شریف نے موسمیاتی تبدیلی سے نمٹنے کے لیے مؤثر اور عملی اقدامات کی ضرورت پر زور دیتے ہوئے عالمی برادری سے مطالبہ کیا ہے کہ یکجہتی کے اظہار کو موسمیاتی آفات سے متاثرہ ممالک کے لیے ٹھوس معاونت میں تبدیل کیا جائے۔ ترکیہ کے شہر انطالیہ میں کوپ 31 کے عالمی رہنماؤں کے اجلاس سے خطاب کرتے ہوئے وزیراعظم نے کہا کہ موسمیاتی آفات کا شکار ممالک کو بروقت امداد اور ایسی مالی معاونت کی ضرورت ہے جس سے ان کے قرضوں کا بوجھ مزید نہ بڑھے۔ انہوں نے کمزور معیشتوں کے لیے امدادی بنیادوں پر موسمیاتی مالی معاونت، سرکاری و نجی شعبوں کے درمیان شراکت داری اور موسمیاتی لچک و موافقت کے لیے فنڈز میں نمایاں اضافے کا مطالبہ کیا۔ وزیراعظم نے چار سال قبل پاکستان میں موسمیاتی تباہی کے عالمی اثرات سے متعلق اپنی وارننگ کا حوالہ دیتے ہوئے کہا کہ ان کے خدشات آج حقیقت بن چکے ہیں، موسمیاتی تبدیلی سرحدوں کی پابند نہیں اور کوئی بھی ملک تنہا اس چیلنج کا مقابلہ نہیں کر سکتا۔ انہوں نے 2022 کے تباہ کن سیلاب کا ذکر کرتے ہوئے کہا کہ پاکستان کا تقریباً ایک تہائی حصہ زیرِ آب آگیا تھا جبکہ تقریباً 3 کروڑ 30 لاکھ افراد متاثر ہوئے تھے۔ وزیراعظم نے اس مشکل وقت میں پاکستان کا ساتھ دینے پر ترکیہ کی معاونت کو بھی سراہا۔ انہوں نے کہا کہ پاکستان عالمی کاربن اخراج میں ایک فیصد سے بھی کم حصہ ڈالنے کے باوجود موسمیاتی تبدیلی کے سنگین اثرات کا سامنا کر رہا ہے اور ماحول دوست اقدامات کے لیے کوشاں ہے۔ کوپ 31 کا اجلاس ایسے وقت میں منعقد ہو رہا ہے جب شدید گرمی کی لہروں، جنگلاتی آگ اور تباہ کن سیلابوں کے بعد عالمی سطح پر موسمیاتی تبدیلی سے نمٹنے کے لیے مؤثر اقدامات کا مطالبہ زور پکڑ رہا ہے۔ اقوام متحدہ کے سیکریٹری جنرل انتونیو گوتریس نے بھی حکومتوں پر زور دیا ہے کہ وہ فوسل فیول پر انحصار ختم کریں، خبردار کرتے ہوئے کہا کہ موسمیاتی بحران سے نمٹنے کی عالمی کوششیں اس بحران کی رفتار سے پیچھے رہ گئی ہیں۔ کوپ 31 کے دو ہفتے جاری رہنے والے مذاکرات 20 نومبر تک جاری رہیں گے، جن میں شریک ممالک پر موسمیاتی اقدامات کے وعدوں کو عملی شکل دینے کے لیے دباؤ بڑھ رہا ہے۔