واشنگٹن، 5 نومبر 2026 (غفران): امریکی محکمہ دفاع کی ڈیفنس انٹیلی جنس ایجنسی (ڈی آئی اے) کی ایک نئی رپورٹ میں ایران کو ابھرتی ہوئی خلائی طاقت قرار دیتے ہوئے کہا گیا ہے کہ وہ مشرق وسطیٰ میں امریکی فوجی کارروائیوں کو چیلنج کرنے کی صلاحیت حاصل کر رہا ہے، حالانکہ امریکہ نے ایران کی اہم خلائی تنصیبات کو بھی نشانہ بنایا ہے۔ رپورٹ کے مطابق ایران نے آپریشن ایپک فیوری کے دوران امریکی خلائی صلاحیتوں کے خلاف جارحانہ اقدامات کیے اور زمینی سطح پر جیمنگ سسٹمز استعمال کیے، جو سیٹلائٹ کے ذریعے فراہم کیے جانے والے جی پی ایس سگنلز میں خلل ڈال سکتے ہیں۔ ڈی آئی اے نے کہا کہ تہران اپنی فوجی اور شہری خلائی سرگرمیوں کو وسعت دے رہا ہے تاکہ دفاعی صلاحیتوں کو مضبوط بنانے، معاشی ترقی کو فروغ دینے اور قومی وقار میں اضافہ کرنے کے مقاصد حاصل کیے جا سکیں۔ اسپیس فورسز سینٹرل کے کمانڈر بریگیڈیئر جنرل ٹوڈ بینسن نے گزشتہ ماہ ایک ویبینار سے خطاب کرتے ہوئے کہا تھا کہ موجودہ دور میں خلا تک رسائی پہلے کے مقابلے میں زیادہ آسان اور کم خرچ ہو گئی ہے۔ امریکی انٹرپرائز انسٹی ٹیوٹ کے خلائی ڈیٹا کے مطابق ایران کے پاس تقریباً ایک درجن فعال سیٹلائٹس ہیں، جبکہ امریکہ کے زیر استعمال سیٹلائٹس کی تعداد ایران کے مقابلے میں ایک ہزار گنا سے بھی زیادہ ہے۔ رپورٹ میں یہ بھی بتایا گیا ہے کہ ایران نے اپنی انٹیلی جنس معلومات جمع کرنے اور اہداف کی نشاندہی کرنے کی صلاحیت بہتر بنانے کے لیے مبینہ طور پر چین اور روس سے سیٹلائٹ معاونت حاصل کی ہے۔ واشنگٹن کے ایران کے خلاف خلائی برتری حاصل کرنے کے دعوؤں کے باوجود بعض امریکی دفاعی ماہرین نے ان دعوؤں پر سوالات اٹھائے ہیں۔ امریکی انٹرپرائز انسٹی ٹیوٹ کے خلائی و ہوابازی کے ماہر ٹوڈ ہیریسن کے مطابق اگر ایران امریکی خلائی صلاحیتوں کو متاثر کرنے کی اہلیت رکھتا ہے تو پھر اس پر امریکی برتری کے دعوے برقرار رکھنا مشکل ہوگا۔ ڈی آئی اے نے مزید کہا کہ ایران اپنے رہنمائی اور نیویگیشن نظام کو الیکٹرانک حملوں کے خلاف زیادہ محفوظ اور مزاحمت کے قابل بنانے پر بھی کام کر رہا ہے۔