نشین، یکم اکتوبر 2026 (غفران): پاکستان نے ایشین گیمز 2026 کے مینز کرکٹ مقابلے کے پہلے سیمی فائنل میں بنگلہ دیش کو 6 وکٹوں سے شکست دے کر گولڈ میڈل کے میچ میں جگہ بنا لی۔ گیلی آؤٹ فیلڈ کے باعث میچ کو 13 اوورز فی اننگز تک محدود کیے جانے کے بعد پاکستان کو 112 رنز کا ہدف ملا، جو قومی ٹیم نے 9 گیندیں قبل 4 وکٹوں کے نقصان پر حاصل کرلیا۔ ہدف کے تعاقب میں پاکستان کو ابتدائی مشکلات کا سامنا کرنا پڑا اور 6.1 اوورز میں 53 رنز پر 4 وکٹیں گر گئیں، تاہم عبدالصمد اور حسن نواز نے 32 گیندوں پر ناقابل شکست 59 رنز کی شراکت قائم کرکے ٹیم کو فتح سے ہمکنار کیا۔ عبدالصمد نے 15 گیندوں پر 30 رنز کی ناقابل شکست اننگز کھیلی، جس میں 5 چوکے اور ایک چھکا شامل تھا، جبکہ حسن نواز 22 گیندوں پر 27 رنز بنا کر ناٹ آؤٹ رہے۔ اس سے قبل پاکستان کے کپتان صاحبزادہ فرحان نے ٹاس جیت کر بنگلہ دیش کو پہلے بیٹنگ کی دعوت دی اور پاکستانی بولرز نے بنگلہ دیش کو 13 اوورز میں 111 رنز تک محدود رکھا۔ بنگلہ دیش کی ٹیم چوتھے اوور میں 21 رنز پر 3 وکٹیں گنوا بیٹھی، تاہم توحید ہردوئے نے 25 گیندوں پر 42 رنز کی جارحانہ اننگز کھیل کر مزاحمت کی، جس میں 2 چوکے اور 4 چھکے شامل تھے۔ سفیان مقیم پاکستان کے نمایاں بولر رہے جنہوں نے 26 رنز دے کر 3 وکٹیں حاصل کیں، جبکہ عرفات منہاس نے 2 اور صائم ایوب نے ایک وکٹ حاصل کی۔ بنگلہ دیش کی جانب سے مہدی حسن، مستفیض الرحمان، رشاد حسین اور نسیم احمد نے ایک، ایک وکٹ حاصل کی، تاہم پاکستان نے کامیابی سے ہدف حاصل کرکے فائنل میں جگہ بنا لی۔