سنگاپور، 28 ستمبر، 2026 (غفران): بالی ووڈ اسٹار عامر خان کو 37ویں سنگاپور انٹرنیشنل فلم فیسٹیول میں اسکرین آئیکون ایوارڈ سے نوازا جائے گا، جو ان کی معروف فلم ’لگان: ونس اپون اے ٹائم اِن انڈیا‘ کی 25ویں سالگرہ کے موقع پر دیا جا رہا ہے۔ عامر خان فیسٹیول میں فلم کی 25ویں سالگرہ کے حوالے سے خصوصی اسکریننگ میں شرکت کریں گے اور ’’اِن کنورسیشن ود‘‘ سیشن میں بھی گفتگو کریں گے۔ سنگاپور انٹرنیشنل فلم فیسٹیول 21 اکتوبر سے یکم نومبر تک جاری رہے گا، جبکہ اس سال فیسٹیول کا انعقاد معمول سے تقریباً ایک ماہ پہلے کیا جا رہا ہے۔ اسکرین آئیکون ایوارڈ ایشیائی اداکاروں کو سنیما کے لیے نمایاں تخلیقی خدمات کے اعتراف میں دیا جاتا ہے۔ 15 جون 2001 کو ریلیز ہونے والی ’لگان‘ کی کہانی 1893 کے برطانوی نوآبادیاتی دور کے پس منظر میں بیان کی گئی ہے، جہاں وسطی بھارت کے دیہاتی خشک سالی اور بھاری ٹیکسوں سے پریشان ہوتے ہیں۔ کہانی اس وقت نیا رخ اختیار کرتی ہے جب ایک برطانوی افسر دیہاتیوں کو کرکٹ میچ کا چیلنج دیتا ہے اور شکست کی صورت میں ان کا ٹیکس معاف کرنے کی پیشکش کرتا ہے۔ طویل دورانیے، تاریخی پس منظر اور کرکٹ کو کہانی کا مرکزی حصہ بنانے کے باوجود فلم نے تجارتی اور تنقیدی دونوں سطحوں پر کامیابی حاصل کی۔ گریسی سنگھ نے عامر خان کے مقابل مرکزی کردار ادا کیا، جبکہ ریچل شیلی، پال بلیک تھورن، سُہاسنی مولے، کلبھوشن کھربندا، رگھوبیر یادو اور اے کے ہنگل بھی فلم کی کاسٹ میں شامل تھے۔ اے آر رحمان کی موسیقی نے بھی فلم کی مقبولیت اور دیرپا اثر میں اہم کردار ادا کیا۔ ’لگان‘ کو 2002 میں 74ویں اکیڈمی ایوارڈز میں بہترین غیر ملکی زبان کی فلم کے لیے نامزد کیا گیا، تاہم بوسنیا اور ہرزیگووینا کی فلم ’نو مینز لینڈ‘ نے یہ اعزاز حاصل کیا۔ فلم آج بھی ان بھارتی فلموں میں شمار ہوتی ہے جو آسکر کے اس مرحلے تک پہنچی تھیں۔ فلم کی 25ویں سالگرہ کے حوالے سے لندن اور میلبورن کے فلم فیسٹیولز میں بھی تقریبات منعقد ہو چکی ہیں۔ عامر خان نے جولائی میں انڈین فلم فیسٹیول لندن کے دوران فلم کی خصوصی اسکریننگ میں شرکت کی، جہاں ان کی ریچل شیلی سے دوبارہ ملاقات ہوئی، جبکہ اگست میں ’لگان‘ نے انڈین فلم فیسٹیول میلبورن کا افتتاح کیا۔ لندن میں خصوصی اسکریننگ کے دوران عامر خان نے فلم کے 25 سالہ سفر پر گفتگو کرتے ہوئے کہا تھا کہ اس سنگ میل کی اہمیت کو الفاظ میں بیان کرنا مشکل ہے اور اس وقت ٹیم نے یقین، جذبے اور خلوص کے ساتھ کام کیا تھا، تاہم انہیں اندازہ نہیں تھا کہ فلم کو کئی دہائیوں تک ناظرین کی محبت حاصل ہوتی رہے گی۔