دبئی، 7 ستمبر 2026 (غفران): دبئی نے دبئی انٹرنیشنل ایئرپورٹ پر مسافروں کی امیگریشن کارروائی کو کم سے کم 12 سیکنڈ میں مکمل کرنے کے لیے نیا بائیومیٹرک امیگریشن نظام متعارف کرا دیا ہے، جس کا مقصد سرحدی کنٹرول کو خودکار بنانا اور دنیا کے مصروف ترین ہوائی اڈوں میں سے ایک پر رش کم کرنا ہے۔ ’’کلک اینڈ ٹریول‘‘ سروس میں چہرے کی شناخت، الیکٹرانک پاسپورٹ ریڈنگ اور خودکار جانچ کے نظام کو یکجا کیا گیا ہے تاکہ مسافروں کی شناخت کی فوری تصدیق کی جاسکے۔ مئی سے اگست تک جاری رہنے والے آزمائشی مرحلے کے دوران 31 ہزار سے زائد مسافروں کی کارروائی مکمل کی گئی، جبکہ باضابطہ آغاز سے قبل مجموعی طور پر 31,373 مسافروں نے اس سروس سے استفادہ کیا۔ نئے نظام کے تحت مسافروں کی شناخت چہرے کی شناخت کے ذریعے کی جاتی ہے جبکہ ان کے الیکٹرانک پاسپورٹ خودکار طور پر اسکین ہوجاتے ہیں، جس سے امیگریشن کاؤنٹرز پر روایتی کارروائی کی ضرورت کم ہوجاتی ہے۔ دبئی کے جنرل ڈائریکٹوریٹ آف ریزیڈنسی اینڈ فارنرز افیئرز کے مطابق یہ سروس دبئی انٹرنیشنل ایئرپورٹ کے مختلف ٹرمینلز پر متعارف کرائی جارہی ہے اور متحدہ عرب امارات کے شہریوں، رہائشیوں، خلیجی ممالک کے شہریوں اور دیگر مسافروں کے لیے دستیاب ہے۔ جی ڈی آر ایف اے دبئی کے ڈائریکٹر جنرل لیفٹیننٹ جنرل محمد احمد المری نے ایئرپورٹ پر ایک بریفنگ کے دوران اس نظام کے آغاز کا اعلان کیا۔ نیا نظام چہرے کی شناخت، بائیومیٹرک ٹیکنالوجی اور خودکار جانچ کے ذریعے مسافر کی شناخت کی تصدیق کرکے امیگریشن کے عمل کو تیز اور زیادہ مؤثر بنانے کے لیے تیار کیا گیا ہے۔