اسلام آباد، 20 اگست 2026 (نوشین): مسابح ارشد کو مس یونیورس پاکستان کے چوتھے ٹائٹل کے لیے منتخب کر لیا گیا ہے۔ انہوں نے معروف بین الاقوامی مقابلۂ حسن مس یونیورس کے لیے سخت انتخابی مرحلے میں کامیابی حاصل کی۔ مسابح ارشد مس یونیورس کے عالمی مقابلے میں پاکستان کی نمائندگی کرنے والی چوتھی پاکستانی خاتون بن گئی ہیں۔ فلپائن میں منعقدہ ایک تقریب کے دوران پاکستان کے مس یونیورس فرنچائز اونر جوش یوگن اور ان کی پیش رو روما ریاض نے انہیں باضابطہ سیش پہنایا۔ تنظیم کی جانب سے سوشل میڈیا پر شیئر کی گئی ایک ویڈیو میں مسابح ارشد کو اعزاز حاصل کرتے اور باضابطہ طور پر مس یونیورس پاکستان کا ٹائٹل سنبھالتے ہوئے دیکھا جا سکتا ہے۔ اپنے سفر کے حوالے سے گفتگو کرتے ہوئے مسابح ارشد نے اس تجربے کو ”ایک حقیقی انعام“ قرار دیا۔ ان کا کہنا تھا کہ اس سفر نے انہیں انسانیت اور اس دوران ملنے والے لوگوں کے بارے میں قیمتی اسباق سکھائے۔ سوشل میڈیا پر ایک پوسٹ میں انہوں نے اپنے سفر کے دوران بننے والے بامعنی تعلقات کو اجاگر کرتے ہوئے کہا کہ اس تجربے نے انہیں انسان ہونے کے احساس سے مزید قریب کیا۔ مسابح ارشد نے لکھا، ”شکر ہے کہ ہمارا سفر یہاں ختم نہیں ہوا، بلکہ یہ تو ابھی شروع ہوا ہے۔“ انہوں نے مزید کہا کہ وہ لمحۂ موجود میں زیادہ جینا اور اس سفر کے ہر قدم سے لطف اندوز ہونا چاہتی ہیں۔مسابح ارشد کا انتخاب عالمی مس یونیورس مقابلے میں پاکستان کی شرکت کے حوالے سے ایک اور اہم سنگِ میل قرار دیا جا رہا ہے۔